Lukas 20:7-21

⁷Iei mine ra pölüeni Jesus, “Äm aisap silei ia a pop seni ie.”

⁸Iwe, Jesus a üreniir, “Ika ina, üsap pwal ürenikemi fän meni pwüüng üa föri ekei mettoch.”

⁹Mürin Jesus a apworausa ngeni ekewe aramas ei pworausen awewe, “A wor eman mwän a fotuki eu tanipin wain. Iwe, a awisa ekoch chon mälämäl pwe repwe tümwünü, mürin a saila lon eu fanü toau.

¹⁰Lupwen a tori fansoun kinikin, a tinala eman nöün chon angang ren ekewe chon mälämäl, pwe epwe angei seniir wisan me lon ekewe föün wain. Nge ekewe chon mälämäl ra wichi ewe chon angang o tinala fän an asöülapö.

¹¹Iei mine a tinala pwal eman nöün chon angang, nge ekewe chon mälämäl ra pwal wichi, ra föri ngeni sokun föför pwe epwe säw ren o tinala fän an asöülapö.

¹²Mürin a tinala aülümanün nöün chon angang. Iwe, ekewe chon mälämäl ra akinasa o asüela.

¹³Mürin ewe mine an ewe tanipin wain a apasa, ‘Met üpwe föri? Iei üpwe le tinala püsin nei we üa fokun echeni. Eli repwe meniniti i.’

¹⁴Nge lupwen ekewe chon mälämäl ra küna i, ra kapasfengen lefiler, ‘Iei i alemürin ätei mine an ei tanipi. Ousipwe niela, pwe sipwe eäni an ei tanipi me ren saman.’

¹⁵Iei mine ra etekinawu seni ewe tanipin wain o niela.” Iwe, Jesus a üra, “Met mine an ewe tanipin wain epwe föri ngeniir?

¹⁶Epwe feito o niela ekei chon mälämäl, nge epwe ngeni pwal ekoch chon mälämäl an we tanipin wain.” Lupwen ekewe aramas ra rongorong ei pworaus, ra apasa, “Apw, sap ina!”

¹⁷Nge Jesus a nenengeniir o apasa, “Ifa chök wewen ekei kapas me lon ewe Toropwe mi Pin? ‘Ei fau ekewe chon kaü imw ra pöütala, pun resap aücheani, a wiliti ewe föün lepwokuku mi fokun aüchea.’

¹⁸Are eman epwe turutiu won ei fau, epwe tatakis, nge are ewe fau epwe turutiu won eman, epwe fokun pachach.”

¹⁹Iwe, ekewe Sensen Allük me ekewe souasor mi lap ra silei pwe a afalafala ei pworausen awewe usur, iei mine ra sotuni ar repwe fötekini Jesus lon ewe otun, nge ra niuokusiti ekewe aramas.

²⁰Iei mine ra mamasa Jesus o tinala chon operi i mi pomweni pomwen aramas mi öch, pwe repwe särei Jesus ren ar kapas ais, pun repwe tongeni atolonga fän nemenemen me pöchökülen ewe kepina.

²¹Ekei chon op ra üreni Jesus, “Sense, äm aia silei pwe ka kapas o afalafal fän wenechar. Aia pwal silei pwe kosap nenengeni nonomun aramas, nge ka afalafala mine a let usun letipen Kot ngeni aramas.