Lucas 20:7-21

⁷Tsa lee re zha nzhab: ―Net nee cho mtaal Juan.

⁸Tsa lee Jesús nzhab lo re zha: ―Neeka na nitʼn naa cho mndaa yalnabee lon ntsowʼn re koree.

⁹Tsa lee Jesús nzhab tedib kwent nanzee lo re men, ne nzhab Jesús: ―Thib welt ngoo thib zha kuu ngonn luts ub dita lo yu zha, ne mndaa zha yu zha kompani lo tedib net zha tsa tenaa zhay, ne ndya zha ngoo zha tith naroob tyemp.

¹⁰Ne leettsa mzin tyemp kuu thop zha yalgonn, tsa mtaal zha thib mos zha, par yanaab kuu ndoblo zha diinn zha. Per lee re zha kuu nke tsiin lo yu zha, mdinke re zhaʼa mos zha, ne mtenet zha mos tabaata.

¹¹Tsa lee zha kuu nak chaan yu mtaal zha tedib mos zha, ne lee re zha kuu nke tsiin lo yu zha, mdinke zha mos ne kwathoz mteti zha mos ne mtenet zha mos tabaata.

¹²Tsa lee zha kuu nak chaan yu mre mtaal tedib mos, per lee re zha kuu nzhann lo yu zha, mloo zha grid mos, ne mlobi zha mos ta nzhannt zha.

¹³Tsa lee zha kuu nak chaan yu nzhab: “¿Kwan tsowʼn? Nal taalʼn thibka xgann na kuu napʼn; ne leettsa wii zha xgann na, ton re zha diiz lo xgann na.”

¹⁴Per leettsa mwii re zha kuu nzhann lo yu lee xgann zha kuu nak chaan yuʼa ndyaad, tsa nzhab zha lo altaa zha: “Zha ree nak kuu kayaa dita chaan xute, leettsa lee xut zha gath. Nda kutha zha, tsa lee yu ree gak chaanaa”.

¹⁵Tsa mloo re zha zha laats ta ndab luts ub ne mbeth zha zha. Tsa mnabdiz Jesús ne nzhab Jesús: ―¿Kwan ntsow goo xgab? ¿Kwan tsow zha kuu nak chaan yu lo re zha kuu mke tsiin lo yu zha?

¹⁶Yaad zha ne kuth zha re zha kuu nzhann lo yu zha, ne taa zha yu zha lo tedib net zha. Leettsa mbin re men kona, tsa nzhab re zha: ―¡Net Diox kona!

¹⁷Tsa lee Jesús mwii lo re zha, ne nzhab Jesús: ―¿Xomod nak kuu nzhab lo xkeets Diox? Ta nzhab: Lee ke kuu mlobi re zha kuu nta yuu, lee nal leey ngok ke kuu mas wen kuu mtob zha skin yuu. Sal. 118:22

¹⁸Ne reta zha kuu ral ke ree nii tats zha, per os lee ke ree la dits thib zha dita tsowe zha.

¹⁹Tsa lee re ngwleyy kuu nabee lo re ngwleyy ne re maestr kuu nloo xkiiz Diox, ngwalaaz zha gaten zha Jesús, tak myeen re zha lee kwent nanzee kuu nzhab Jesús, nloo naa xomod nak re zha. Per nzeb zha ne zha re men, kona mlaa zha Jesús ne ndya zha.

²⁰Tsa lee re zha kuu nayii ne Jesús thibka nkwaan re zha mod ten zha Jesús. Tsa mtaal zha chop tson zha kuu ntsow taxal zha kuu wlipaa ngeteed lo Jesús, beeta par yegaa Jesús, os lee Jesús ni thib kuu ndoblote, tsa tak taa zha Jesús lo gobyern.

²¹Tsa nzhab re zhaʼa lo Jesús: ―Maestr, neʼa nee lee re kuu ndediza ne re kuu nlooʼa nak kuu wli, ne lalka nzhak leettsooʼa neʼa reta men, ne nali nlooʼa xnet Diox lo re men.