SAN LUCAS 20:15-33

¹⁵Ex tamaxtul ixlhimaqspa ni anchanu lakatꞌun, va tamaqnil. Ex ni Jesús jalaklhisakmil: —¿Ex chuncha tas kamakayacha ni xaꞌukxtin ni tꞌun?

¹⁶Va kaminaꞌ la ixtꞌun, kalaqmaqniꞌoyaꞌ ni anchanu tapatsanin. Kaxtaqniyaꞌ ni tꞌun aqayntaun. Ex ni lapanakni yu taqasmaklhi va tanaul: —Jantu chun kaval.

¹⁷Ex ni Jesús jalaqtsꞌil, va naul: —Incha jantu chuncha kaval, ex ¿valiꞌiycha inchine najun yu tsꞌoqkanta la ixchivinti Dios? Ni chiyux yu jantu kamapatsaputul yu tamakay chaqaꞌ chavay yucha yu apalay maqskꞌiniy.

¹⁸Vachuꞌ naul ni Jesús: —Mas va taꞌayuꞌ lapanaki kataqalqoslhi ni anchanuꞌ laka chiyux, kataqalhiyaꞌ. Pero incha ni anchanu chiyux kapatajul y kaꞌaktꞌalmal qayntaun lapanaki ex va kalhiꞌakxajtachal tacha pꞌoqxni.

¹⁹Ex yu xaꞌukxtinin kuras kun yu ixtamasuy ixlhachimoꞌonkꞌan ni israelitas va takꞌatsal ni Jesús ixlaklhichiviniy ni yuꞌuncha tejkan jalaqputeꞌenil ni anchanuꞌ chivinti. Xlhiyucha ancha ixtalakxkajuy tacha katapuchꞌapal ni Jesús. Pero jantu katachꞌapal, va ixtatalhauniy ni lapanakni yu ancha tayanal.

²⁰Ex ni yuꞌuncha jalaqmalaqachal lapanakni yu ixmakakan tacha ox lapanakni kataval. Va ixtamakanuputun ni Jesús para kanaul tuꞌuchun yu jantu ox. Ex chuncha lay katalhaꞌanil ni xagobernador.

²¹Xlhiyucha talhisakmil, va tanaul: —Jamalaniniꞌ, ni kijnankꞌan ijkꞌatsayau va si laqsaval yu naꞌun y si laqsaval yu lakmalaniy ni lapanakni. Vachuꞌ jantu makꞌay kuenta taꞌayucha ni lapanaki. Uxintꞌi ayaj ox jamasuniy ixchivinti Dios.

²²Va klalhisakmiyau incha maqskꞌiniy kamapalniu impuestos yu xaꞌay jalhachimoꞌonuꞌ Roma u jantu.

²³Pero ni Jesús yucha kꞌatsal va ixtamakanuputun. Va jalakjunil: —¿Valiꞌiycha kilalaqtsꞌintanuyaucha?

²⁴Kꞌimasunin aqxtaun tumin. ¿Ni aniy tumin tas ayuchacha ixꞌukxpucha? ¿Tas ayucha ixtaqaꞌuti aniy tsꞌoqmukꞌanikanta? Ex chuncha tanaul: —Va ixꞌukxpuꞌ kun ixtaqaꞌuti ni xaꞌay jalhachimoꞌonuꞌ Roma.

²⁵Ex chuncha jalakjunil: —Kaxtꞌaqnitꞌik yu jalhachimoꞌonuꞌ Roma yu ixnavin yucha y kaxtꞌaqnitꞌik Dios yu ixnavin Dios.

²⁶Ex chuncha jantu lay katamakanul ni Jesús la ixtalakaꞌukxpukꞌan ni lapanakni. Tus vak jalakmakal por ixchivinti, ex yuꞌuncha saq taval.

²⁷Ex chuncha lati ni saduceos talaqꞌal ni Jesús. Yuꞌuncha ixtanajun ni jantu takujchoqoy yu janinin. Ex va chuncha va tajunil ni Jesús:

²⁸—Jamalaniniꞌ, ni Moisés kintatsꞌoqnin la ixlhachimoꞌon incha kanil qayntaun lapanaki y kamakauntijlal ixanati y jantu kalhitsukunil sasꞌatꞌa, ex yu ixpꞌisaqa maqskꞌiniy katꞌatsukuchoqol ixanati para kalhitsukunil sasꞌatꞌa por xajayaꞌ.

²⁹Ex chuncha ixꞌalin qayntujun tꞌalaqaunin. Yu xajayaꞌ lakxtuklal, va nil, jantu kalhitsukul sasꞌatꞌa.

³⁰Ex yu pꞌunaj ixpꞌisaqa tꞌatsukuchoqol ixanati pero vachu nil, jantu kalhitsukul sasꞌatꞌa.

³¹Ex va chuncha yu aqayntaun ixpꞌisaqa vachuꞌ tꞌatsukuchoqol ni xanati ex vachu nil. Ex vachu va chuncha val kun tachun ni tꞌalaqaunin, jantu katalhitsukunil sasꞌatꞌa.

³²Ex taval vachuꞌ nil ni xanati.

³³Ex tejkan katakujchoqoyaꞌ ni janinin, ¿taꞌayucha ixanati kunaꞌ? Qayntujun tꞌalaqaunin va si ixtatꞌatꞌajun.