LUKA 20:15-33

¹⁵Bena imea murimurinai e veria lasi e alaia mase. Imea biaguna be ede baine karadia toma?

¹⁶Ia na do bainema, imea ireḡuna taudia baine aladia ore, imea na idaudia haida baine henidia. E kamonai taudia eto, Ia! Lasi! Dia unuheto!

¹⁷A ia ese e raraidia, eto, Buka ai e torea herevana anina be dahaka? Ruma ikarana taudia ese e dadaraia nadina na Daiguna nadina ai vada ela.

¹⁸Una nadi latanai baine moru tauna na baine makohi; a una nadi ese baine kurea tao tauna baine pata rohoroho, ḡahu na heto.

¹⁹Una hora ai itorena taudia bona hahelaḡa taudia ese idabai-taona e ura, to aru taudia garidia e gariva; badina be idia dibadia una sivarai heḡereḡerena matana be idia ediai.

²⁰Bena e itaia tao, bona dibaka taudia e siaidia, bae nanadaia kara maoromaoro taudia na heheto, ena hereva amo bae idoaia, bena gavana imana ai bona siahuna ai bae henia eto.

²¹Idia ese e nanadaia, eto, Hahediba taumu e, ai dibamai emu hereva bona emu hahediba na mamaoromamaoro, bona taunimanima oromadia to lalomu, a Dirava ena dala o hahedibalaia ḡoevaḡoevamu.

²²Kaisara ena tax monina baita henia na maoro eiava?

²³A ia be edia koikoi dibana, bena e haere, eto,

²⁴Silver monina ta ba haheitalaigu. Daika laulauna bona daika ladana bini? Idia eto, Kaisara.

²⁵Bena ia eto, Kaisara ena, Kaisara ba henia; Dirava ena, Dirava ba henia.

²⁶Bena aru taudia vairadiai ena hereva amo asie idoaia; ena haere e hoalaia, asi edia hereva ta.

²⁷Una murinai Sadukea taudia haida ia dekena ela: una orea e tomava mase na basie tore isi lou. Bena e nanadaia, eto,

²⁸Hahediba taumu e, Mose ese emai taravatu e henimai, eto, Tau ta baine mase bona vabuna baine noho asi natuna, vabu na ihana ese baine adavaia, natuna baine havaraia mase tauna ena.

²⁹Benaini, tadikaka hahitu e nohova, tau guna ese hahine ta e adavaia, to asi natuna vada e mase.

³⁰Ihararuana bona ihatatoina ese una hahine e adavaia,

³¹ela bona hahituosi ese vada e abia. To iboudiai e mase, asi natudia.

³²Gabeamo hahine danu vada e mase.

³³Tore-isi-lou negana ai, una hahine na daika adavana? Badina be hahituosi ese e adavaia.