San Lucas 20:15-33

¹⁵Orzeꞌ bduꞌ yaa dey yu zeꞌ. Bloo dey yu lat lyucy urbyay zeꞌ. Orzeꞌ biit dey yu. ’¿Na lac gyicy yu nu guni lyucy urbyay zeꞌ nu de yu nu mnuuz coz cyaal zeꞌ rsaꞌ lagy der?

¹⁶Na chay cut yu dela yu nu mnuuz coz cyaal zeꞌ. Orzeꞌ zeeñ yu lyucy urbyay zeꞌ yaa reñaꞌ mbecy ―nam rab mi dey. Na ornu güeñ dey de coz nu mniim zeꞌ, orzeꞌ na dey: ―¡Cueꞌ nu ni gac ñii! ―na dey.

¹⁷Orzeꞌ Jesuuz bgüiim lo dey. Orzeꞌ nam rab mi dey: ―Beni lac mod yaruu de riidz ni Ñgyoozh zeꞌ nu rniiñ: Gyitaꞌ nu mneꞌ biryu, byac ñi gyitaꞌ nu ricy zir ñi presis rniiñ.

¹⁸Cyu ziꞌl mbecy nu gyes saa lo gyitaꞌ zeꞌ, orzeꞌ gzug lay. Zeꞌ benu gyitaꞌ zeꞌ gyet lag ñi too ca na mbecy, orzeꞌ gyagyez la mbecy zeꞌ ―nam.

¹⁹Orzeꞌ de uz zub lo gal nu de yu nu rlyuu leey ni Ñgyoozh ngulagy dey nguꞌ yaa dey Jesuuz laab or la zeꞌ, gun gud lagy dey nu lo dey pcaam ornu mniim riidz tiily zeꞌ. Tees wancuꞌ yaa dey mi, gun rdzib dey lo de mbecy.

²⁰Orzeꞌ psiiñ dey ni Jesuuz. Orzeꞌ bzuu nez dey la be mbecy nu chay lom. Orzeꞌ mbecy zeꞌ bicy dey tub mod nap par lo Jesuuz, tees gal nu bduꞌ cuen ziꞌl dey mi ben a wad mod nu guꞌ dey mi yaa de yu nu riib ic por cuen ni gubier.

²¹Orzeꞌ na dey rab yum: ―Masht, de̱ ya̱ rad lagy de̱ nu de coz nu rniir gal nu de coz nu rlyuur, ndeꞌ coz rishli, nunu wagyicy cuen ru la na tub ga mbecy, sinu rlyuur mod nu rlagy Ñgyoozh nu chuꞌ den nu rishli.

²²¿A gruu nap ñi nu griib den tiñ nu rbic dey ni yu nu riib ic de nasyoong, uti waruu nap ñi? ―na dey.

²³Tees Jesuuz bi gud lagy mi nu walab nu dutuub la lardoo dey rniiy lom.

²⁴Orzeꞌ nam rab mi dey: ―Blyuu der tub tiñ lo̱. ¿Cyu nab ca lo tiñ ii? Nunu ¿cyu nu la ca looñ? ―nam. Orzeꞌ na dey: ―Lo César, yu nu riib ic de nasyoong, gal nu nu lay ―na dey.

²⁵Gazeꞌ nu nam rab mi dey: ―Briic der ni yu nu riib ic de nasyoong coz nu nac niy. Nunu briicaꞌ der ni Ñgyoozh coz nu nac nim ―nam.

²⁶Orzeꞌ wangad mod nu riib dey cyi ic mi nu nac de coz nu mniim lo dela mbecy, sinu se za nu ziꞌl ic dey yuꞌy. Orzeꞌ wannii gaꞌ la dey.

²⁷Gazeꞌ nu gua la be mbecy saduceo gua güii dey Jesuuz. Na de mbecy saduceo rnii dey nu ornu gat mbecy, orzeꞌ wayabañ dey. Orzeꞌ ndeꞌ nu bdugyiꞌ dey lo Jesuuz. Orzeꞌ na dey rab yum:

²⁸―Masht, Moisees pcaay par dela den nu benu tub mbecy gat bicy yu, nunu zeeñ yu mñaay, zeꞌ sac iꞌñ mi, orzeꞌ mbecy zeꞌ rlagy ñi chelaay mñaa bicy yu nu gut zeꞌ par nu cuic yu iꞌñ mi por cuen ni bicy yu yu nu gut zeꞌ, na Moisees.

²⁹Orzeꞌ bzu gagy mbecy nuy bicy yu. Orzeꞌ yu loga la guud mñaay. Orzeꞌ gut yu nunu wangyeeñ iꞌñ yu ni mñaay.

³⁰Orzeꞌ yu cyup zeꞌ pchelaa gaꞌy mi. Orzeꞌ niꞌ ziꞌl gutaꞌy, nunu wangyeeñ iꞌñ yu ni biñ mñaa zeꞌ.

³¹Orzeꞌ niꞌ ziꞌl yu chon pchelaa gaꞌy nu biñ mñaa zeꞌ. Orzeꞌ zaꞌ gagy laa dey pchelaay mi. Tees wangyeeñ iꞌñ ni tub la dey nim.

³²Laab ndeꞌ la, orzeꞌ biñ mñaa zeꞌ gutaꞌm.

³³Na ornu shuub dzi nu gyabañ de mbecy gut, ¿ca na dey zeꞌ gac mñaay biñ mñaa zeꞌ? Gun zaꞌ gagy laa dey pchelaay mi ―na dey.