SAN LUCAS 20:15-33

¹⁵Tuhme quenda sa̱hn chahn sa̱hn cua̱hn chihto na̱n va chenda̱ta me, ne chihno se sa̱hn. Ra̱hn Dihvo vo ri ye ihyan chahn: ―¿Deh din ihyan che dihve chenda̱ta me nduco sa̱hn chahn?

¹⁶Ca̱hn ye, ne decuihno ye sa̱hn. Tuhme ca̱h ye chenda̱ta me ta̱h ta̱ma ca ihyan che din ye ntiyon nduco. Nducote chihnevan sa̱hn fariseo che chenun se min ne, ra̱hn se: ―¡Tahque ndah ndete che hua cuahnecun Dendiohs che tihca̱ co!

¹⁷Ate ndihchero Dihvo vo sa̱hn chahn, ne ra̱hn ye ri ye sa̱hn: ―¿Tuhme deh conahn che ndirun na̱n Ndudo yahn Dendiohs tuhca̱?: Tu che hua quenan ino sa̱hn che rahto vah ne, chemin che tahque chichihve.

¹⁸Ihyan che cotahno ye u ne, anduhneca̱ ndete che conda̱h ndudo ye na̱n tu me, nda̱ca yah ye. Me ihyan che hua cotahno ye u ne, anduhneca̱ ndete che conda̱h ndudo tu me ihyan, cuihnonan yahn ye.

¹⁹A ura min no, chidocuya̱n ndina̱n ma̱n, sa̱hn devano ley che dirun Moisés ma̱n ne, ran dito se che nahn cota̱h se Dihvo vo, te tumacadino se che a yahn se che nte ye ejemplo me. Ate hua dehva din se, te va̱h se ihyan ya̱n.

²⁰Tuhme dechuh se a̱ma o se che din ca̱ se che ndah ihyan se, ca̱va che tumerande se ihyan, din se che ca̱hma ye a̱ma ndudo che hua nda̱hca̱. Tihca̱ din se, te nahn ca̱ca nunde se yahn ye na̱n gobernador.

²¹Ra̱hn sa̱hn chahn ri se ihyan: ―Ihyan Ricuahn, a devano nuhn te ndah ndudo che rente ne ma̱n, ricuahn ne ma̱n. Da̱ma no rendihche ne nducoya̱ca ihyan, ne ricuahn ne numa cua̱co nduhca̱ che nahn Dendiohs che cuahtechica ihyan.

²²Ca̱hma ne co ne nuhn: ¿a redin yahn che nedihvo vo tume ca̱de iyo yahn César, o hua?

²³A devano Dihvo vo te o na̱n o chende sa̱hn chahn, ne ra̱hn ye ri ye sa̱hn: ―¿Dehco che retumarande nchuhn u?

²⁴Cona̱hma ne a̱ma tume u. Cuahn che ndihchero ye tume me ne, tumerune ye sa̱hn: ―¿Duh yavena̱n ma̱n, duh che duche ma̱n, quenan na̱n tume cuh ne? Ndahconan sa̱hn chahn: ―César.

²⁵Tuhme ra̱hn ye ri ye sa̱hn: ―Cha che rihquentiyon César ne, codinahn nchuhn, ne cha che rihquentiyon Dendiohs ne, namin codinahn ne.

²⁶Hua chi tumerande se ihyan nduco nde a̱ma ndudo na̱n ihyan ya̱n. Cuahn ino se chi yahn che tihca̱ ndahconan ye, ne chahte dihn chende se.

²⁷Chihno min ne, nda̱ a̱ma o sa̱hn saduceo. Sa̱hn chahn ne, hua ritahno se che va che ntuche tena̱hn. Ra̱hn se ri se Dihvo vo:

²⁸―Ihyan Ricuahn, na̱n ley che dirun Moisés ne, rihquentiyon tuhca̱: “Ndete che coh a̱ma se che hua nda̱ca da̱ya se nduco nda̱hta yahn se ne, va che cahneva̱co dihno se nduco te, ca̱va che hua cuihno nda̱ta yahn dihno se.”

²⁹A̱ma yune ne, chahte ndache se che dihno se vih. Sa̱hn che mena̱n me ne, chihneva̱co se nduco a̱ma nda̱hta. Ate hua no ra̱hn me ne, chih se, ne hua nda̱ca da̱ya se nduco te.

³⁰Chihneva̱co a̱ma dihno se nduco te, ne namin chih se, ne hua nda̱ca da̱ya se nduco te.

³¹Tihca̱ queri a̱ma sa̱hn chahn, nduh che ndache se, chihneva̱co se nduco te, ate chih nducoya̱ca se nde a̱ma se hua nda̱ca da̱ya se nduco te.

³²Adive ne, chih nda̱hta me.

³³Nda̱ ro che ntuche tena̱hn ne, nducote nduh che ndache se chihneva̱co se nduco ta̱hn min ne, ¿cha se che nda̱hta yahn se ta̱hn ne?