Luk 20:15-33

¹⁵Binabu diting mala sangua umangua saing dung mati. “Tauna, ahatum baru? Wain umangang moxonoa bagula riadi baru?

¹⁶Bagula ma ung lipu umanga wasanganamgadi ba mati, saing sina umangua na teladi.” Bungina lipudi dilungu alaba, daharua ba, “Laku, sanga ba sok bila te!”

¹⁷Ne Yesu bagu taxa manadi saing xusungadi ba, “Nabu aharua bila ba, bing baru namuxinta mana Urana Xuanoa ba: “ ‘Sianga lipu numa tongtongianganamdi dihitixiya bila diana, sok siang mugamugangam bu haringia numa rubing longgalo’?

¹⁸Lipu gaxarea xungdi mari mana siangga ba bagula duxurutiti, saing lipu gaxarea siangga ba xung mari manadi, bagula dimunanggi.”

¹⁹Lipu hanaunaunga tubatubainganamdi digabu lipu hananiangamdi yanamidingdi disai daxanga bu dituxu hata sibuna li, namua na daxabia ba su haruanga babuna baguba manadi. Ne dimaxuwa mana lipudi.

²⁰Duwasa haringina mana, baing disoxi lipu bagubagungamdi, ne dilangua ba ding lipu maxunamdi. Dituba ba dilanglangua Yesu bu harua haruanga tela maring te. Dituba bila ba bu dituxu dita haruangia gabana maxania.

²¹Binabu lipu bagubagungamdi daharua na ba, “Lipu Tubatubaingam, am gaxabia ba ung lipu haruanga tubatubaik maxunam, ulibu hasusu mana lipu longgalo, saing utubatuba Urana daxanganoa xaung haruanga maxuna.

²²Tauna, ubaxanga nam. Maring mana tagim takis mala na Sisa, kimbo doa?”

²³Ne Yesu xabia muragidinga saing harua nadi ba,

²⁴“Ahatanga siang mukiring tela nanga. Gaxarea babunoa li? Gaxarea yanoa wa mana?” Dahaxuya ba, “Sisa naga.”

²⁵Baing harua nadi ba, “Tauna, axadi Sisa iniadi, asinadi na Sisa, saing axadi Urana iniadi, asinadi na Urana.”

²⁶Baing ina naga, sanga ba dilanglangua bu harua doa lipudi maxadingia te. Dihixi mana haxuyanganoa, binabu dimumguti.

²⁷Baing bakbakka Sadyusi teladi dima rangua bu duxusunga mana axamang tela. Ding dahatiam mana lipudi bagula dimesa muli.

²⁸Daharua ba, “Lipu Tubatubaingam, Moses bung haruanga tela makira Urana Xuania ba nabu lipu tela mati, sangua haininoa, ne garang tate, bing kixinginoa bagula yau sabanganoa tabinoa bu tang daxap garadi masok, saking sabanganoa bakbagindi bagula disup te.

²⁹Tauna, bunging tela neng sabangang 7 duwa. Mugamugangama yau haing tela saing mati, garang tate.

³⁰Bing kixinginoa ma kimu mana mugamugangama yau tabinoa saing mati, garang tate.

³¹Hiliadinga kubolu taininau. Bila balau laing disup,

³²baing ina naga, hainga mati.

³³Tauna, kimuya, bungina lipudi dimesa muli, bing haingga ba bagula wa gaxarea haininoa sibuna? Namua na 7 ding diyau ba.”