Samu 19:1-11

¹Yake dokome Kamongo Anatu baa neta renge ingyuo karamo doko panelyamo. Pyuo wasiyamo kingi mono dokome banya kingiŋi lao panelyamo.

²Yuu gii kwuara yangara pyuo pao epo pipyamo dokome Anatumi pyuo wasiyaŋa lao pano lapa lapa pilyamo.

³Mendasa wambu ingyuo epo pii lao dee lyapu lao pipyamo see nange.

⁴Dopa pipyamopape nakambana neta rao yuu muu dupwana pumbinyi dokome yake yuupi rambungi dolapona kapa kapa pyuo soo otelyaminyi. Anatumi yake dokona renge kuiyuo rao karena lao panda wasakamiya.

⁵Enda mapwae lenge kambu nyuo akali makandalana rungi rungi pingi dopale ingyuo rao potemo epenge.

⁶Yake pinjingi pakirena kanda sepala pao pinjingi paki dokona oko singi. Kama ketae piso rao karelyamopa bange mendemepe kapa nee pii nange.

⁷Kamongona mawa pii dupwa nyisu yakunaipi pisa nao singi dokome wambu enenge ingyuo porai renge maingi. Kamongona mawa pii dupwa soo nyepala karapenge ingilyamo dokome yangilyamo karelyaminyi wambu dupwa singinya renge maingi.

⁸Kamongona mawa pii dupwa rolae ingyuo penge. Mendeme dokona soo rape rape lao minyaraminyi dupwa rae maiyuo parami. Banya mawa pii pinya lao lenge dupwa angi dokona lenge dokome soo nyingi renge maingi.

⁹Kamongo lao kingi wapambupi lakao lakandenge doko keyange ingyuo singi. Dokona dopako pyuo soo para ingilyamo. Kamongome koo keyangepe lao yapalya yapana pyuo angi dokona lenge. Doko peparae rolae ingyuo penge.

¹⁰Anatunya mawa pii rungi rungi pingi dupwame kana golo ama keyange doko nyuo isa palyingi. Dee mende suu pyao doko amburalinya ipwange rende pipyamopape Anatunya mawa pii doko ama rende wakasa pingi.

¹¹Mawa pii dupwame namba embena kendemande karo doko soo nyinginya renge nyuo jingi. Jilyamopa nambame banya pii doko rape rape lao pyakamingi dokona baame renge keyange isingi jingi.