Mboe 19:1-11

¹Mboe ki Dabit Koroŋ boozomen ta timbot sala saamba a, tizzo iti pa Anutu zaana biibi. Pa koroŋ munŋaana men ta timbot sala kor a, ina ni nama muriini. Tana tizzo iti pa mburaana, ŋgar kini, azuŋka kini, mi mbulu kini ndabokŋana.

²Aigule ta boozomen tizzo iti pini. Mi mbeŋ ta boozomen tipaute iti pini.

³Koroŋ ta timbot sala maŋaanaŋana na, kwon be tiso sua som. Tana iti teleŋ kalŋan som.

⁴Tamen sua kizin ila irao lele ta boozomen ma karkari tileŋ lup. Anutu iur zoŋ le muriini ta, tau imbot sala maŋaanaŋana na.

⁵Zoŋ pok ma ise kembei ta tomooto ula popoŋana ta iyooto pa ruumu kini raama menmeeni. Mi irao kembei tomtom mbolŋana ta mataana isiŋsiŋ be imaŋga pa londi kini.

⁶Zoŋ ise pa lele pakaana ta, mi ikakat ma ila isula pa pakaana toro. Mi koroŋ sa irao be ike pa mburaana na som.

⁷Sua ta Yooba ikam piti, ina ambai komboono, mi ipombolmbol iti tomtom. Mi zaala ta Yooba iur piti na, ka tutu itortooro som. Tana irao tendemeere mi tapase pa. Mi zin wal ta len ŋgar biibi som na, tutu tana ipeyei ŋgar pizin.

⁸Tutu boozomen ta Yooba iur piti, ina indeeŋe men. Mi ikamam ma lelende ambai. Tutu ki Yooba iurur mat piti. Ikam ma matanda ikam pak.

⁹Tomototo Yooba mi teleŋleŋ la kalŋaana, to ambai. Pa mbulu ta kembei, ina iŋgeeze men. Mi ko imbotmbot ma alok. Tutu ta Yooba iur na, itortooro som. Imbol ma imbotmbot. Tana irao tendemeere mi tapase pa. Mi tutu tana indeŋdeeŋe men.

¹⁰Ŋonoono, iti tere pat gol kembei koroŋ zaanaŋana. Tamen sua ki Yooba ilip pa. Gol boozomen ta iŋgeeze kat i, na sa ilip pa Yooba sua kini som. Mi bigil suruunu ta kembena. Inamut kat. Tamen sua ki Yooba na, inamut ma ilip.

¹¹Yooba, nio mbesooŋo ku. Mi sua ku ta iurur mat pio. Nio sombe aŋto sua tana, inako aŋkam leŋ kadoono ambaiŋana kat.