SALMOS 92:7-13

⁷Kate' ẕgólegak benne' ka' ẕbej yíchjgake' Dios kan ẕgole yix̱e', na' žežój chawe' da' žongak benne' wen da' ẕinnj ka', naken nich kwia yí'gake' to chi'ize.

⁸Le', X̱ana' Dios, nakkzo' Dios ẕente.

⁹Nak bia' da' gak chegak benne' ka' ẕží'igake' chio' Ḻe', X̱ana' Dios. Nak bia' kwia yi'gak benne' ka' bi ẕḻé'egekle' Le' chawe'. Wẕonnjgak yógo'te benne' wen da' ẕinnj ka'.

¹⁰Le' žono' ga nakža' neda' waḻe kan nak to beže. Ẕgo'o set yichja' da' žon chochen yichj ḻáẕda'wa'.

¹¹Da' likze ḻe'ela' benne' ka' bi ẕḻé'egekle' neda' chawe' wzóa ẕíbgake' ḻawa' neda', na' yenla' kwež nyáche'gak benne' ka' bdíḻ-ḻengake' neda', benne' wen da' ẕinnj ka'.

¹²Changak benne' chawe' ka' ka žongak yag zina' ka'. Gólegake' kan ẕgólegak yag sedro ka' ḻaw Ya'a Líbano.

¹³Zej nake' ka to yag da' zen ḻo ḻi'a yodo' che X̱anžo Dios, dan' ẕgóleḻe'en ḻo ḻi'a liž Dios chežo.