SALMOS 91:2-10

²wak yi'e Dios: “Le'kze žx̱en ḻaža'a, na' Le' ẕkache' chawo'o neda'. Nako' Dios chia', na' žx̱en ḻaža'a Le'.”

³Ḻe' wkache' chawe'e le' ḻo da' ẕia da' bi nḻa' ḻawn, na' ḻo yižwé' da' žoten benne' ka'.

⁴Wkache' chawe'e le' ka žon to ẕkoko', bian' žape chi'iba' bríse'do' ka' ẕan x̱ilba', na' cho'o chawo'o ḻo ne'e Ḻe'. Yeḻa' ḻi ḻaže' chie' gon chi'in le', na' wkache' chawen' le'.

⁵Bi be gak wchebe le' žel, na' bi be gon le' da' ẕia te ža,

⁶na' to yižwé' che da' choḻ bi be gonen chio' le', na' to da' ẕinnj da' žoten benne' ka' te ža, bi be gonen chio'.

⁷Wak gatgak to mil benne' ka' kwito' le', na' chi mil benne' ka' gawze gan zo', san bi be sako'o le'.

⁸Wio', na' ḻe'elo' da' ẕia da' gaken chegak benne' wen da' ẕinnj ka'.

⁹Wẕi'o X̱anžo Dios, na' žx̱en ḻažo'o Ḻe', na' Dios, Bennen' nape' dot yeḻa' wak, wkache' chawe'e le'.

¹⁰Che ḻen bi be da' ẕia gak bi da' gonen chio', na' bi cho'o nitó yižwé' ližo'.