Salmos 89:8-41

⁸Shiy kizpurtishcha kurakish. Wizpurireetsish shaana payuksha. Shiyamari itsinsaru tsiyataksha. Nish tsapurunasish ¿yapeeja ashima pangchich? Shiyapa tatsamooru wanindaja.

⁹Shiyamari kasiksha. Mus kapungumash mar warastakachu, anoo shiysha wizpurirpatish tuzanaksha.

¹⁰Shiyamari kungushchee watarimashee kapunguwaa kamiran kasiksha. Maachee tsipama ashiru kamiran kachingaksha. Wizpurirpatish kundarareetstamtish kasiksha. Tusuwambeerush, arap kapeetambayarush, kasaksha.

¹¹Kanindaatstam, misha tsapurunaseetstam shaana urutamari taamaam tinarangsha. Tsapurunasee tinarangush ichingaru maacheetsi tinayarush wayarangsha.

¹²Shiyamari ichingaru ashpiri tsapurunasee tinarangsha. Macheetstam íwar tinarangush, mach Taborshuchtam, mach Hebronshuchtam tinarangush, mang' kis shiyamun shambatkusin; Apanll kizpurcha wanasir, atanaya.

¹³Apaa, pachtamishish wizpurish kapung taariya. Kuwish mbutsinungich wizpurirpatish shiyamari kasiksha.

¹⁴Shiy kurakarush, shaana tputsee mangoo yasayarush, wanasiri wayaksha. Misha, urutamari kurak wanasirimash watsinas taaksha. Uru iyaa tputseetsini chinaksha, iyaa nda kasaksha.

¹⁵Ashiri Apaa, Tputs shiyaa kis shambatkusin, ungirtaksin, uru mang' kis taakanaya. Shiyash nungish tachitkusin, 'sinish kis taakanaya.

¹⁶Shiyamunatam mang' ksakanaya. Watam shiyamari itsinsaru tputsee yasakush itsinsaru tsiyatakshawa.

¹⁷Apaa, Iy tputsini shiyamun wizpurirish kchitaruni wanasir taakaniya. Shaana zandkush, iyaam wizpureetsish aranginasha panaksha.

¹⁸Shiy wizpurirpatish xanxapishpapaz ashiru iyaa kámanaksha. Iysha Israelchichini Apanllee iycha kurakarini. Kizpur wanasircha, atiniya. Ashiri, Apaa, mazinangcha:

¹⁹Apaa, sirútama shiysha miranish tputsireetsish tsiyatarangush, Nuwsha tputsee, yuw nda puniku anu, kurakaam ipusarangina. Kizpur putit nda puniku, anoo ipusaranguri istarangina. Tputs sur Dapiyaa. Nuwtanda tputsiri. Ashiri nuwsha Israelchichee ksutamaam wayarangina, Wamari kasiru tsapurunasshuchee kánuru taachiya,

²⁰Nuw Dapiyaa wayungunpa wanasirimashpa tapararanguri, Israelchicheem ksutamaam kurakaam ínarangina.

²¹Ayamtaati Dapiyaa istamaam mbizcheezi. Nuwaanpata wizpuriri tuwizpurtataw ashkuri kizpur taachiya,

²²Undararshitisin, Kasiyani, tusin, pinasachinllinaya. Natsampansha tputs kasichazinllinaja.

²³Nuwsha Dapiyaa undararee wizpurirpati kátimbayaruri kasachima. Ayamtaati Dapiya undarareetsi yusur pangcheeja. Undararee zurampatari kachingeeruri, kasachima. shiy shaana Dapiyaatsee tárangsha Apaa. Mishat Apaa, shiy Dapiyarineetsi tárangitamtish

²⁴Nuw urutari Dapiyaa chinakuri, uwsha nuwamun mang' tatchiya. Nuwamunatam wizpuriri aranginasha wizpur kapung taachiya.

²⁵Dapiy wamari tputsee kasikchu, ashchiri Mediterranewshucheetstam, misha Eufratisshucheetstam shuneerusin kasichiya.

²⁶Dapiya nuwapat tsiyatku. Apaa, shiyaa nuwcha Apari. Mishat, shiyaa nuwcha Apanlliri. Watam nuwaa tapachindakush, ksutakshawa, Dapiya nuwaa táchiya.

²⁷Nuwaa tákchu, nuwsha Dapiyaa, ipareetspazi iwachiztamaa ashiruri aranginasha istachima. Tsapurunasshuchee kurak wamari kasichiya.

²⁸Nuw nuwaana Dapiyaa kapung kasiru chinakuri, yuwaa nuw Dapiyaa tárangi anu urutamari taachiya. Nllitaritaa chinacheezi, shiysha Apaa Dapiyaa tárangsha, Mishat Apaa, shiy Dapiyaa wachinllinootsi tárangitamtish,

²⁹Dapiyaa wachinllinur tputs pzapaneekchusin, kanind nduma pastachu, uru kurakaamtam kinachinlliniya.

³⁰Itaru, uwshtisin nuwaa kuki kapeetkinaareesinaya, yuw nuw kamachtarangi, anoo nda ambi ashirusin taaksin, nuwsha wanichima.

³¹Wandaya nuwaa kuki nda payuksin, kamachtamareetsi kapeetkusin,

³²waneeshshipasha wanichima. Anumandtam pzkooshishpa pzkookpaz ashtachima.

³³Ashiritaati, ayamtaati Dapiychichee tputs kasacheezi. Chinakuri, urutamari uwapa taarataraw ashtachina.

³⁴Nuwaanaatsi kuki kapeetcheezi. Urutamari payuchima.

³⁵Nuw kuki ayamamtiyam pastacheeja, tárangi, an zurampataricha tárangi. Nuwaanamuntari suri tárangina. Nuwaanaatsi ngichcheezi.

³⁶Ndatuma sitarunas pastachu, Dapiychichtisin tputs kurakawtam taachinlliniya.

³⁷Ndatuma kanind íwari pastachu, tsup tamatarparee ashiru urutamari taachinllinaya, shiy Apaa, shaana tárangshawa.

³⁸Itaru Apaa, shiy ambtaa tárangush, ashiritaa Dapiyarinchichee nlluranur kasarangsha. Kushtarangsha. Tayutaritarangsha. Shaantataa kurakaam ipusarangush, ashiritaa shiy tsiyantarangush, na kapeetarangsha.

³⁹Yuwaa sirú Dapiyaa tárangish anoo kapeetarangsha. Dapiyarinchichee nlluranur ngatarangush, na zurampatari kasarangsha.

⁴⁰Shiysha Undarareetsi zanganirangush Utaáchchee yaktarini ichingaroo kapeetaranganaya. Watandpunoo pátang, pátang, tawata, tawata ashimbaranganaya.

⁴¹Watam shaana tputsireetsish kanasarangshawa. Minshuchtisin tputs anoo parangusin, yaktash pshtuyarusin, maacheetsi shuchiranganaya. Sheeru iyashcheetsi napeersin staranganaya.