Salmos 72:4-18

⁴Guchi'e̱ chee̱ benne' ca' zaj zue̱' lu da ba xa' lu xe̱zre chee̱ntu', ne guselé̱' bidu ca' chee̱ benne' ca' dxelexázrjene̱', ne guzría xi'e̱ benne' ca' dxulusaca zi'e̱ bénneache.

⁵Xelezrebe̱' Lue' dxácate̱ ne zua gubizra, ne beu' lawe' tu cuen tu cuen bénneache.

⁶Gaca wenná bea na' ca nisa xiuj da dxaca naga ba nadín, ne ca xrle̱'e̱la da dxaca dxe̱la lu xe̱zr la xu.

⁷Lu zra chee̱ wenná bea na' gaca da xrlátaje, ne xelebeza zri lazre' bénneache dxácate̱ ne zua beu'.

⁸Nna be'e̱ dute̱ xe̱zr la xu, ne dxu'a xe̱gu Eufrates, ga zrinte̱ dxu'a nísadau'.

⁹Lau le̱' xuluzú zribe benne' ca' zaj zre̱'e̱ xe̱zr la xu, na' guzéxruje̱' lazre' benne' guledábague̱' Le̱'.

¹⁰Benne' wenná bea chee̱ xe̱zr la xu Tarsis, ne wenná bea ca' chee̱ tu tu cue' xe̱zr la xu zitu' ca' xelelé̱'e̱ zaj nu'e̱ da xulunézruje̱' chee̱', na' benne' wenná bea chee̱ xe̱zr la xu Sabá, ne wenná bea chee̱ Seba xulunézruje̱' chee̱' da gunní'a.

¹¹Xúgute̱ benne' wenná bea ca' xuluzú zribe̱' lau le̱', na' benne' xúgute̱ cue' xe̱zr la xu xelune̱' zrin chee̱'.

¹²Le̱' guselé̱' benne' ca' dxelexázrjene̱', benne' dxululáwizre̱' le̱', ne guselé̱' benne' ca' zaj zue̱' lu da ba xa', ne quebe sua nu benne' gácale̱ne̱' le̱'.

¹³Xexache lazre̱' benne' xache' ca', ne benne' ca' dxelexázrjene̱', na' guselé̱' benne' xache' ca' chee̱ xelaca bane̱'.

¹⁴Xexá'awe̱' benne' xache' ca' lu na' benne' we̱n lazre' ca', ne benne' snia ca'. Gune̱' ba xuzre guselé̱' benne' ca' lu na' benne' ca' dxelutie̱' benne'.

¹⁵Gaca ban wenná bea nigá, na' xulunézruje̱' chee̱' oro chee̱ xe̱zr la xu Sabá, na' tu xelenábazqueze bénneache Dios gácale̱ne̱' le̱', ne te zra chizrela xelenabe̱' Dios gune̱' gaca chawe' chee̱ wenná bea na'.

¹⁶Tu zrígadauze zrua' xtila xelaze̱' lu xe̱zr la xu, ne lu xí'adu ca', da cuíale̱'e̱ na ca da dxebía lu xi'a Líbano, na' benne' zaj zre̱'e̱ lu xe̱zre ca' xelane̱' ca xixre' ze̱ lu xe̱zr la xu.

¹⁷Tu súazqueze la benne' wenná bea na'. Tu xuluchálajzqueze̱' chee̱ la le̱' dxácate̱ ne zua gubizra. Ne̱ chee̱ le̱' gaca da ba neza chee̱ bénneache xúgute̱ cue' xe̱zr la xu, na' xelenné̱' chee̱' naca chee̱' da ba neza zrente̱.

¹⁸Xrlátaje naca Xránadxu Dios, Dios chee̱ benne' Israel ca', na' tuze Le̱' dxune̱' da dxexebánedxu.