Gesami Hea:su 72:4-18

⁴Hina bagade da hame gagui dunuma molole fofada:mu. E da hahani hame gagui dunu amo fidimu, amola ilima banenesisu dunu amo hasalimu da defea.

⁵Eso da digagala:sea, amola oubi da digagala:sea, eso huluane manebe amoga, dia fi dunu da dima nodonanumu.

⁶Hina bagade da gibu amo da bugili nasu sogega dabe defele ba:mu. Amola e da gibu soge da:iya dabe agoai ba:mu.

⁷E da osobo bagadega esalea, moloidafa hou salusaluiwane heda:lebe ba:mu. Amola oubi da eso huluane mae fisili diga:lebe, amo defele ea soge ganodini bagade gagui hou dialoma:ma!

⁸Isala:ili hina bagade ea ouligibi soge da hano wayabo bagade la:idi bega: asili la:idi bega: doaga:mu. Amola Iufala:idisi hano amogawi asili osobo bagade sinado la:idi asili eno sinado amoga doaga:mu.

⁹Hafoga:i soge ganodini fi dunu da ea midadi begudumu. Ea ha lai dunu da ili gobele osoboga gala:la sa:imu.

¹⁰Siba:ini hina bagade dunu ilia amola ogaga esalebe hina bagade, ilia da ema iasu imunu. Ala:ibia amola Idioubia hina bagade dunu ilia da ema iasu gaguli misunu.

¹¹Osobo bagade hina bagade dunu huluane, ilia da ea midadi begudumu. Fifi asi gala dunu huluanedafa da ea hawa: hamosu hamomu.

¹²E da hame gagui dunu amo da ema webe, amo gaga:sa. Amola e da hahani hame gagui dunu, amola dunu amo da eno dunuga fisiagai, amo gaga:sa.

¹³E da gasa hame amola hame gagui dunu ilima asigisa. E da hahani hame gagui dunu ilia esalusu gaga:sa.

¹⁴Ilia da enoga banenesisa:besa:le amola enoga fasa:besa:le, e da ili gaga:sa. Bai e da ilia esalusu amoma asigisa.

¹⁵Hina bagade da gebewane sedagili esalumu da defea. Ala:ibia dunu ilia da ema gouli imunu da defea. Dunu huluane da eso huluane e fidima:ne sia:ne gadomu. Amola eso huluane mae fisili ema nodolalumu.

¹⁶Isala:ili soge ganodini, gagoma defeledafa dialumu da defea. Amola agolo huluane amo da ha:i manu bugiga nabai ba:ma:mu. Amola amo ha:i manu gamisu da noga:idafa, Lebanone soge ea gamisu defele ba:ma:mu. Amola moilale gagai amo da bugili nasu da gisiga lele dedeboi dagoi agoai ba:sa, ilia da dunuga nabai ba:ma:mu.

¹⁷Hina bagade ea dio amo hamedafa gogolei ba:mu da defea. Eso da eso huluane dialumu amola hina bagade ema nodone dawa:su da amo defele dialoma:mu. Fifi asi gala huluanedafa da ema nodonanumu da defea. Ilia da Gode da ema hahawane ima:ne, Godema adole ba:ma:mu. Amola e da hahawane fawane ba:ma:ne, ema sia:mu da defea.

¹⁸Hina Gode, Isala:ili fi ilia Gode, Ema nodoma! Hi fawane da amo fofogadigima:ne hou ida:iwane gala hamosa.