SALMOS 69:4-35

⁴Zej nyanže benne' ka' bi ẕḻé'egekle' neda' chawe' ka zej nyan yicha' yichja', na' bi be ẕia nbaga'a. Benne' ka' ẕžá'agake' neda' zej nákḻi'e waḻe. Benne' ka' žóngake' neda' ẕia, na' bi zoa biẕ chen'. Žon byéngake' yeyiẕjwa' da' bi wlana'.

⁵Dios, nnézkzelo' Le' bena' da' yaḻze, na' ẕḻe'ekzlo' doḻa' da' bena'.

⁶X̱ana' Dios ẕente, bi go'o latje benne' ka' žx̱en ḻáže'gake' Le' yedoé'egekle' ni'a che da' bena'. Bi go'o latje benne' ka' zá'gake' chio' chíx̱gekle' ni'a chia' neda', Dios chegak benne' Israel ka'.

⁷Dan' nži'ila' Le' ẕchíx̱gake' neda', na' ḻo yeḻa' sto' zoakza'.

⁸Naka' ka to benne' zi'to' ḻawgak benne' ljéža'do' ka', na' bi zej nónbi'e neda'.

⁹Žeye ẕla ḻáẕda'wa' dan' žé'ḻi'a wnné yoe che ližo'. Da' ẕnnégak benne' ka' chio' Le', Dios, naken ka ẕnnégaken' chia' neda'.

¹⁰Wžeža', na' bena' wbás, na' ben dítjgekle' neda', na' che ḻen ẕchix̱la'.

¹¹Ḻezka' bwakw kwina' ḻaže' zeche'. Bḻé'egekle' neda' ka to da' ben dítjgekle'.

¹²Benne' yolawe' ka' wnnégake' chia'. Benne' we'j ka' ben dítjgekle' neda' ḻo da' béḻgake',

¹³san neda' bḻiža' Le', X̱ana' Dios, kan žaz ḻažo'o Le'. Dios, ḻo yeḻa' žeyache' ḻaže' ẕen chio', na' dan' nakkzo' Benne' weslá cheto', benle chia'.

¹⁴Bebéj neda' ḻo da' zede gan zoa'. Naken ka yoa'a ḻo gona' gže'. Bi go'o latje chazžan'. Beslá neda' ḻo na'gak benne' ka' bi ẕḻé'egekle' neda' chawe'. Naken ka yoa'a ḻo nis zil.

¹⁵Bi go'o latje gata' neda' ka to benne' ẕgache'e ḻo nis zil na', nich bi gaka' ka to benne' chejchaze' to ḻo yežw gže', gan choa'a, na' wkachen' neda' to chi'ize.

¹⁶Bechebe chia', X̱ana' Dios, dan' cháwe'ḻe'e nak yeḻa' žeyache' ḻaže' chio'. Da, gokḻen neda', dan' ẕente nak yeḻa' žeyache' ḻaže' chio'.

¹⁷Bwia kan nak da' žaken chia' neda', wen žin chio'. Dan' že' zédḻe'ela', ben byene yenlo' chia'.

¹⁸Da ka' gaze ga zoa' ni, na' beslá neda'. Beslá neda' dan' zej nyanḻe'e benne' ka' bi ẕḻé'egekle' neda' chawe'.

¹⁹Le' nnézkzelo' kan ẕchíx̱gake' neda', na' kan že' zédḻe'ela', na' kan žon dítjgekle' neda'. Ẕḻe'ekzlo' yógo'te benne' ka' ẕžá'agake' neda'.

²⁰Dan' ẕká'ngake' neda' ka'ze žedó ḻaža'a, na' že' zédḻe'ela'. Wleza' no benne' yeyache' ḻáže'le' neda', san bi wzóa no benne'. Wleza' no benne' gon choche' neda', san bi wzóa no benne'.

²¹Bwáwgake' neda' da' sḻa', na' kate' wbiḻa', byé'jgake' neda' da' zichj.

²²Ben ga gak lni ka' chegak benne' ka' ka to do yeḻj gan chéjgake', na' ben ga yeyák yeḻa' ba nez chégake' to gan chejchégwgake'.

²³Ben ga choḻgak yej ḻáwgake' nich biž ḻé'egekle', na' ben ga ẕízetezegak benne' ka'.

²⁴Ḻo yeḻa' ẕža'a chio' bžia yi' benne' ka'. Ḻo yeḻa' yichj ža'a chio' ben ḻégake' zi'.

²⁵Ben ga bi soa no benne' ḻo ližgak benne' ka', na' bi soa no benne' ḻo yežlyó chégake'.

²⁶Wžía ḻáže'gake' bennen' bsaka' zi'o, na' žẕížegake' dan' ẕzaka' bennen' beno' ḻe' we'.

²⁷Bḻoe'e ḻaw doḻa' da' zej nbaga' benne' ka', na' bi go'o ḻégake' latje gákgake' toze ḻen benne' chawe' chio' ka'.

²⁸Bsoḻe lagak benne' ka' ḻe'e yiche chegak benne' ka' zej nape' yeḻa' nban da' naken li ḻaže', na' bi wzojo' lágake' gan zej nyejw lagak benne' chawe' ka',

²⁹san neda' zoa' ḻo da' ẕzáka'ḻi'a, na' že' zédḻe'ela'. Beslá neda', Dios, na' bechís neda'.

³⁰Goḻkza' da' wká'n ẕenen La la'y che Dios chia'. Wká'n ẕena' Ḻe' ḻen da' žoe ḻawa' Ḻe'.

³¹Da' ni žaz ḻáže'že Dios ka to bež gota' ḻawe', o ka to biado' zej žia lozba', na' sógo'ba'.

³²Ḻé'ekzegekle benne' gax̱jw ḻaže' ka' da' ni, na' yebégekle'. Le biga' ḻaw Dios, na' Ḻe' gon choche' ḻe'e.

³³Ženle X̱anžon' chegak benne' ka' žiážjegekle', na' bi ẕzoe' cheḻa'ale benne' chie' ka', benne' zej nyejwe' liž ya.

³⁴¡Le wká'n ẕene' Ḻe', ḻe'e zoale ya'abá, na' ḻe'e zoale yežlyó nga, na' ḻe'e zoale ḻawe' nisdo', na' yógo'te da' nníta'gaken yógo'te latje ka'!

³⁵Dios beslé' benne' ka' nníta'gake' yež Sión, na' yeyone' yež ka' zej žen' ḻo yežlyó Judá, na' chejnníta'gake' ga na', na' gata' chégake' yežlyón'.