Buka Linge 69:4-35

⁴Agaira tara niu ghighirou tabo tana subo au vulei na lei vuvulu ni ulugu. na lei ghagua na kana raeni tara kene taoniu ge kara haurakeu tara goni tabei. A gaira tara gunaliu nia na sorisori, tara nongia na lavi oliana na hava tu mua gitoa.

⁵Ghe God, ighoe to ghilala tua ivei te vaghaa na bulegu; kara mua tangomana na polo itatana matamu na lei palugu.

⁶Ko bei lubatira agaira tara talu mavagho ge kara saisari kiba na pukuna Inau, Ighoe, Lord, puku ni maana, te haba. Ko bei lubatiu ge ku gonia vanira siki totobo ge kara vatei maamaagha, Ghe God ni Israel.

⁷Inau tara lavi buleagu mara lavi maamaagu nia, na pukuna Ighoe tana reireigu na gegerena na kabu rurughu iga.

⁸Hughua na lei puku ni hoghogu tara vaghara tara mua ghilalau, E vaghau na tinoni komu keha tara nia na paheagu.

⁹Na nilabu ni valemu te vavu tana lokagu; vaghaa keri ke, agaira tara bosa dikalagho ighoe ke tara bosa dikalau ghua Inau.

¹⁰Ara batobatou tana bona tu dikalio mu maturu toro tana matana a Lord.

¹¹Tana bona tu nia pupulu na pupulu ni roku ge ku talutatea nigua na dikalio, agaira tara batobatou.

¹²Na lei vure ni komu ni vure tara niu tutugu, mara lingea na lingegu agaira udolu tara Inu bulebule.

¹³Hauva ka, mi nau tu tona haliu so ta nigua na kokoeliulivuti vaniamu, Ghe Lord, Tu ghanaghana dila ge na bona ni aho eni tua ko tatea vaniu nimua na kulakulagha tana hahanga. Ghe God, ta nimua na dolo te mua soko buto, tughu vaniu mai ta nigua na kokoeliulivuti ta nimua na hahanga ni togholuvu.

¹⁴Ko hola kehau tana nenepa; ko bei lubatiu ge ku ghoi lulumi horu ghua! vavolau itadira tara nia ghighirou, mo ko holo kehau tana lei beti lalo.

¹⁵Ko ba lubatia na tave ni beti ge ke luvuhiu, pa kara sonomiu gea na lei beti lalo, mana taripiti ni mate ke taghalaghiniu.

¹⁶Ighoe Lord, ko bosa tughuni na lei nigua na kokoeliulivuti, nia nimua na dolo te mua soko buto te utoutoa lee. Ko ririu mai mo ko righitaoniu, nia nimua na veiarovi tara subo au vule lee.

¹⁷Ko bei polo vania nimua na ghairau; ko mina mo ko bosa tughu vaniu, Inau tana gunaguna sule ngangata.

¹⁸Mai mo ko vavolau; ko niu ge ku tatavahale itadira na lei ghagua na kana.

¹⁹Na lei kokoe batobato tu lagavulei to ghilalai tua ighoe, na kabu rurughu mana vatei maamaagha. Ighoe to righi kaekalera tua na lei ghagua na levunimate, mo ghilalai na hava tara kokoei.

²⁰Na tobagu te kurusu na pukuna didira na lei kokoe horu, mu mua loghoa siki ghanaghana dila. Ghe a sakai na vaovarongo ni tinoni ke tatei na balu veiarovi; ge a sakai vamua na tinoni ke ririu pulohi me ke togholuvuu.

²¹Hauva ka, mara heu na vanga te mali; mara haua vaniu na wine mali ge ke va uto pilea nigua na mangahau.

²²Ge na bela ni vanga tara subo au vule te gonidila vanira tana matadira ke liliu ni taripiti ni tinoni. Ma didira na tinoni ni righitaoni ke ghoi liliu ni taripiti.

²³Ko rorodoi na lei matadira ge kara bei nighi vaevane mo ko nira kara lugu.

²⁴Kovala horua mai nimua na rutu i vuvungadira, ko ghani taghalaghinira nia nimua na rutu papara.

²⁵Ko nia na komudira ge ke Olina mana lei vaevaledira kara kokoba.

²⁶Vanira agaira to hera tua na totoro, agaira tara ghoi savungighi nia so na lei kokoe horu tana sosokona, ara nia batobato na vahaghitaili te kalera agaira to nira ghighirou.

²⁷Ko vahikolui na lei paludira me ke dato na ovu ni, mo ko bei va hera gea na tatavahale.

²⁸Ko durakei na ahadira tana buka ni vola, ko bei taladira ge kara idumi kolura itadira tara kabu marabu.

²⁹Inau tu kale totoro mu vahaghitaili, ko vavolau, Ghe God, nia nimua na maana ni vavola.

³⁰Ghe Inau ku holoutoa na ahana God, nia na linge, mu ku talu habaa gaia nia na holoutoana.

³¹Nia te vagha keri, Inau ku holoutoa a Lord, vulea na niana sukaghi na dalei buluka pana niana hevei na buluka te kalagha me base na ghughuna.

³²Agaira tara talumurira kara vaevanea a Lord, ta didira na lutu ma kara nia togotogo. A gaira udolu tara kakaea nina na hahanga God kara kabu tana togotogo.

³³A Lord te rongovighi datoi didira na lei kokoeliulivuti agaira ra nia tara liona na hahanga e mua tiba kehara ra nina tara vahaghi tadira.

³⁴Kau holoutoa agaira, Ghe na kokou mana maramana i pari iani pari na lei tahi mana lei totobo soko tana gharasu ilokana.

³⁵A God ke vavola Jerusalem me ke kisu olighi na komu ni Judea. I kakeri ku kabu iga nina na lei vure ma kara vunaghi pungisiu na bona mana pari.