SALMOS 68:9-35

⁹Bseḻo'o to nis yejw wáḻeḻe'e, Dios. Kate' bedó ḻáže'gak benne' chio' ka', na' Le' ben chocho' ḻégake'.

¹⁰Benne' ka' zej nake' chio' chejnníta'gake' yežlyó chio' to chi'ize. Ḻo da' nak chawe', Dios, žox̱o' benne' yache' ka'.

¹¹X̱anžo Dios bseḻe'e to diža' chawe', na' bseḻe'e benne' zante, benne' bzéngekle' benách ka' diža' chawen'.

¹²¡Bẕónnjgake'! Bẕonnjgak benne' wnná bia' ka' ḻen benne' chégake' ka', benne' žjake' ḻo wdiḻe. No'le ka' bené'egekle' da' gota' chegak benne' ka'.

¹³Ḻa'kze bkache' kwinle gan žape chi'ile ẕila' ka', gákwle da' naken ka x̱il plomdo' ka' da' zej naken x̱tan, na' ya plat, na' doba' ka' chegak x̱ilba' ka' zej naken ya oro.

¹⁴Kate' Dios, Benne' ẕente, besḻase' benne' wnná bia' ka' ga na', na' bex̱jw bege' da' bgakwn Ya'a Salmón.

¹⁵To ya'a ẕen nak Ya'a Basán. To ya'a ẕenḻe'e nak Ya'a Basán na'.

¹⁶¿Biẕ chen' ẕwíale, ḻe'e, ya'a ẕen ka'? Ẕwíale ya'a na' gan žénele Dios soakze'. Da' likze soakze X̱anžon' ḻaw ya'a na' to chi'ize.

¹⁷Karro ka' che wdiḻe da' nape Dios zej nyanḻe'en. X̱anžo Dios zezé'e gan že' Ya'a Sinaí nich soe' latje la'y chie'.

¹⁸Beyepo' ya'abá, bechi'o benne' ka' bebejo' ḻo na' yeḻa' got. Wẕi'o da' chawe' ka' da' bnéẕjwgak benne' ka' chio' Le'. Ḻezka' benne' ka' bží'igake' chio' Le', gota' da' bénngake' chio' Le', Dios.

¹⁹¡Ga'n ẕen X̱anžon'! Tža tža žónnḻi'e da' chawe' chie' chežo. Nake' Dios, na' žeslé' žo'o.

²⁰Dios, Bennen' nake' Dios chežo, beslé' žo'o. X̱anžo Dios na'kze beslé' žo'o ḻo na' yeḻa' got.

²¹Da' likze Dios gone' we' yichjgak benne' ka' ẕží'igake' chie' Ḻe'. Gone' we' yichjgak benne' ka' žónteze žóngake' doḻa'.

²²Wnná X̱anžon': “Gona' ga yežinle lažle, yeza'le ḻaw Ya'a Basán. Gona' ga yeza'le že'l ḻo nisdo', na' yežinle lažle.

²³Wlejle žen chegak benne' ka' ẕdíḻ-ḻengake' ḻe'e, na' beko' chele ka' ḻé'jgakban'.”

²⁴Za'gak benne' chio' ka', na' žoe ḻáwgake' Le', Dios. Ḻo yeḻa' žebele chégake' žó'ogake' latje la'y chio'.

²⁵Zejnéžwgak ḻawle benne' ka' žóḻgake'. Benne' ka' ẕkwéẕgake' da' ẕgóḻgake' zjake' ẕántele. Gachj ḻawle zjak x̱kwide' nó'ledo' ka' zej nóx̱o'be' da' ka' ẕgóḻgakbe'.

²⁶¡Le wká'n ẕen Dios gan zej ndobe benách chie'! ¡Le wká'n ẕen X̱anžon', ḻe'e nakle ẕa'só Israel!

²⁷Ḻezka' zjak ẕa'só Benjamín ka'. Zej nake' bábzegake' san ẕnna biá'gake'. Ḻezka' zjak benne' zan ẕa'só Judá, na' benne' zan ẕa'só Sabulón, na' benne' zan ẕa'só Neftalí.

²⁸Dios, bḻoe'e ḻaw yeḻa' waḻe chio'. Ben choch, Dios, dan' beno' ni'a cheto'.

²⁹Dan' nak ẕen yodo' chio' da' zoan ḻo yež Jerusalén, benne' blo ka' kó'ogake' da' zej nape' ḻawo' Le'.

³⁰Bdiḻ-ḻen benne' ka' chegak yež zi'to' ka', benne' ka' ẕdíḻ-ḻengake' benne' chio' ka'. Zej nake' ka bež zan ka', ḻen ẕí'ngakba' ka', dan' ẕdíḻ-ḻengake' yež zan ka' nich kwéjgake' yeḻa' wnni'a chégake'. Besḻás benne' ka' žaz ḻáže'gake' chjake' ḻo wdiḻe.

³¹Ḻa'gak benne' wnná bia' ka' che yežlyó Egipto. Benne' ka' che yežlyó Etiopía gon byéngake' wká'n ẕéngake' Dios.

³²¡Le goḻ che Dios, ḻe'e zoale dot yežlyó! ¡Le goḻ che X̱anžon'!

³³¡Le goḻ che Bennen' ži'e ya'abá na'le, dan' wzóan zga'ale! Le wia nga, nnie' kan ẕnne wzió'.

³⁴Le wia nga, nape Dios dot yeḻa' wak. Ḻo yeḻa' ẕen chie' ẕwíakze' benne' Israel ka', na' ẕan ya'abá nla' ḻaw yeḻa' waḻe chie'.

³⁵Ẕžébeto' Le', Dios, gan zo' latje la'y chio'. Dios chegak benne' Israel ka', žon chochkzo' benne' chio' ka'. ¡Ga'n ẕen Dios!