Miti Mânec 68:9-35

⁹Anutu, go hoe micsâko hesietec wahawec, fuŋfuŋfâcge betaŋkepie sâc bâgunuc‐jopameŋ.

¹⁰Lama gurufâcge jaŋe ira ŋeŋe hae bâfuambiŋ, Anutu, buurucgere hapetac hone maiŋ ejaremeŋ.

¹¹Wofuŋzi bubiaŋ biŋedâŋ mufuawec; ŋokac hâmbâŋ sâkozi kiŋaŋ rahuc dâŋ bârâwiŋkembiŋ:

¹²“Ŋicwofuŋ jaŋe momorifâc‐jeŋic jaŋehec wiseŋgopieŋ.” Ŋokac haeo ŋeŋenezi mafa mateŋ kâdoc qaŋgopieŋ.

¹³Jaŋe hapâ fakecne siliwazi ɋorockekicne iŋucne, â mâmâŋ‐jeŋic i gol sâsârekicne ârâŋ ɋâri irec sâc. Ehame wemocte lama sapaoa ŋezo muŋgopieŋ?

¹⁴Bapafârezi ŋicwofuŋ qâtâtiec‐jopawecko, Zalimoŋ tikio sinou wahawec.

¹⁵O tiki sâko mako, Basaŋ tiki, o tiki qoŋne qoŋne, Basaŋ tiki!

¹⁶Tiki qoŋne qoŋne go wemocte Anuture tiki iiŋguuŋ ecnekomec? Tiki ira hâcne Wofuŋzi jusanaŋkeocte bâwosâewec.

¹⁷Anuture ʒika keretac tauseŋne tauseŋne bocjaha, irec faio Wofuŋzi Sinai beherâ tirificko fisiwec.

¹⁸Go faic hefâmeŋ, niŋgiŋ‐jopakicne jowac‐jopameŋ; ŋic jaŋere guruo taha fua‐garewec, râŋgeŋne jaŋerao mâmâc; ine go ira Wofuŋ Anutu jucmurâ iŋuc emeŋ.

¹⁹Wofuŋ muteŋkezo, e ʒoaŋ sâc de âsic enâreekac, Anutu e bâbâpiaŋ‐nâŋec.

²⁰Anutu‐nâŋec e bâbâpiaŋ Anutu; Wofuŋ Anutu e hâmockonec babatarac‐nâpo irec hata focnekac.

²¹Anutu e râsifâcne jaŋere qizec hefâuckeocmu, ŋic moc sindaŋ hata‐ticnao juocmu, ere utu mai hefâuckeocmu.

²²Wofuŋzi muwec, “No Basaŋkonec bârisiec‐jopapemu, no hâwec ʒâkâŋkonec bârisiec‐jopapemu;

²³eme kikege sâcne socko ʒurecmu, â qâtofâcge nameŋ‐jeŋic râsi jaŋeraonec suanʒeŋ fua‐jareocmu.”

²⁴O Anutu, ʒeri hombaŋgere ŋic biri ʒora tiri ufuŋgao honec‐jopakicne. Anutu Wofuŋ Sâko gore biri ʒora hâcne.

²⁵Gae hehe jaŋe micne bambiŋ, musi bapa jaŋe ʒâhec rambiŋ, ŋondeŋ‐jeŋicko naru ŋokaczi woŋgâŋ qambiŋ:

²⁶“Tutumaŋ sâkoo Anutu muteŋkezo, Wofuŋ e Israere opâ ʒâŋe.”

²⁷Benjamiŋ guru pitic jaŋe micne bajarehuc raŋgopieŋ, Juda guruonec ŋicbomboŋ, guru sâko raŋgopieŋ, erâ Sebuloŋte ŋicbomboŋ â Naftalire ŋicbomboŋ.

²⁸Tâpirigere fuŋne bataniŋkec, o Anutu; go ŋezic‐nâpohuc tâpiri bâfua‐nâremeŋ i fosanaŋkezejec.

²⁹Jerusalem taha ufuŋge ŋekac irec erâ ŋicwofuŋ jaŋe taha bagare fisinʒepieŋ.

³⁰Saparac uupicko qowi juŋgopieŋ jaŋe hanec‐jopazemec, kâte bulimakao guru kâcɋene â piticne mâmâc. Moneŋte harac eŋgopieŋ jaŋe âtenʒaŋ‐jopazemec, ʒikare aŋac‐jopakac ŋicguru i bâtâtiec‐jopazemec.

³¹Aigita mâreŋkonec ŋic fekicnezi ʒocnehec fisiŋgopieŋ, Etiopia mâreŋkoneczi mejeŋic Anutu sicnecneŋgopieŋ.

³²Mâreŋte ŋicguru, Anutu gae hecneniŋ, Wofuŋ mumumbiaŋ gae hecneniŋ.

³³E sambâŋte sambâŋ, esecne fuawec irec faio rac warec juekac, eme marac fânâŋ sâko‐ticne râwiŋkeme, mâreŋ sâc manaeŋgopeneŋ.

³⁴Anuture tâpiri muafeckeniŋ, ʒai ʒonʒoŋ‐ticnezi Israe ɋorockekac, tâpiri‐ticnezi karoracko fuakac.

³⁵Anutu tirific‐ticnao jukac i bipinehec; Israere Anutu eki ŋicfâcne tâpiri â sasanaŋ hejareme huekac. Anutu muteŋkenaŋ!