Salmos 56:2-13

²Te zra chizrela benne' ca' dxeledábague̱' neda' dxulucá'ana dítaje̱' neda', lawe' da zaj zra' benne' zante̱, benne' dxeledíl-lale̱ne̱' neda' lu xel-la' dxulucá'ana szren cuine̱'.

³Lu zra dxezreba', dxuxrén lazra' Lue'.

⁴¡Dxuxrén lazra' Dios, na' güe lá'ana' xrtizre̱'! ¡Dxuxrén lazra' Dios, na' québedxa zreba'! ¿Bízraqueze gaca gun bénneache chia' neda'?

⁵Xúgute̱ zra dxuluchuque̱' xrtizra'. Ca naca da dxelegú'u be'e̱ zaj naca na chee̱ xelune̱' chia' da cale̱la.

⁶Dxelezrague̱', ne dxulucache cuine̱'. Dxelenná' xánnie̱' ca da dxuna'. Dxelilaj lazre̱' ca xelune̱' xelútie̱' neda'.

⁷Dios, bxue ca da dxelune̱', na' dute̱ xel-la' dxezrá'a chiu' bzria xi' benne' ca'.

⁸Nézqueznu' Lue' ca dxuzrúnnuja' lau benne' ca'. Bsa lazre' nisa da ba gudxezra'. ¿Quebe zaj naxúaj na lu xiche chiu'?

⁹Gate dxuláwizra' Dios, lu zra ná'queze xuluxuzrunnuj benne' ca' dxeledábague̱' neda'. Nézquezda' zúale̱ Dios neda'.

¹⁰¡Dxuxrén lazra' Dios, na' güe lá'ana' xrtizre̱'! ¡Dxuxrén lazra' Xránadxu, na' güe lá'ana' xrtizre̱'!

¹¹¡Dxuxrén lazra' Dios, na' québedxa zreba'! ¿Bízraqueze gaca gun bénneache chia' neda'?

¹²Nabaga' ca da nache̱be lazra' chiu', Dios. Gúl-laqueza' da güe lá'ana' Lue'.

¹³Ba bseláu' bénne'du xu'a lu xel-la' gute, ne bebéaju' ni'a naga zaj zua cheajlechaze na, chee̱ gaca chu'a lau Dios lu xel-la' naxaní' da dxunne̱' chee̱ benne' ca' zaj naca bane̱'.