A Umana Kakailai 56:2-13

²Kaugu lavur ebar dia mainge ba diat a konome iau ra bungbung par, Tago mangoro diat dia varubu ure iau ma dia vavagia pa diat mulai.

³Ba ta bung iau burburut, Ina nurnur uka tam.

⁴Ta ra varmari kai God ina pite pa kana tinata; Iau tar nurnur tai God, ma pa ina burut; Ava mulai ra tarai diat a pait ia piragu?

⁵A bungbung par dia pukpukue kaugu tinata, Ma ra nuknuk i diat ba diat a vakaina iau.

⁶Dia vana varurung, dia kiki uai, Dia gire vakilang kaugu vinavana; Maia, da di kobot upi kaugu nilaun.

⁷Dave, diat a pila bar ta kadia varpiam? God, una rapue ra umana vuna tarai.

⁸U nunure kaugu lavur vinavana vurvurbit; Una varurue ra lavur lur na matagu ta kaum paura; Dave, pa di tar tumu vake diat ta kaum buk?

⁹Nam ra bung ba iau tangi tadav u kaugu lavur ebar diat a lop uka; Go ra magit iau tar nunure, ba God i tur maravut iau.

¹⁰Ta ra varmari kai God ina pite pa kana tinata, Tai ra Luluai ina pite pa kana tinata.

¹¹Iau tar nurnur tai God, pa ina burut. Ava mulai ra tarai diat a pait ia tagu?

¹²Iau tar vavalima piram, God, Ina tul tar ra tinabar na pite varpa piram.

¹³Tago u tar valangalanga ra tulungeagu kan ra minat, Maia, ma u tar balaure ra kaugu pi koko na tutukai, Upi ina vanavana ta ra luaina mata i God Ta ra kapa na nilaun.