Salmos 55:2-19

²Guzúa ban lazre', ne beche̱be chia'. Dxuláwizra' Lue' lu da dxuchálaja', ne zua' ste̱be,

³lawe' da benne' dxeledábague̱' neda' dxelenné̱' chia', ne lawe' da dxelún la benne' we̱n da cale̱la neda'. Bulusebague̱' neda' da zrinnaj, ne dute̱ xel-la' dxelezrá'a zaj nau zi' xuzre̱' neda'.

⁴Dxe' gunne xue lázrdawa' lu be̱la' dxen chia', ne dxuchebe xel-la' gute neda'.

⁵Zua' lu xel-la' dxezrebe, ne dxezríztequeza', na' zúale̱ neda' da dxuchebe na neda'.

⁶Na' gunnía': ¿Nuzra gunna neda' xrila' ca xrila tu bsia chee̱ cha'a lu be'la naga xezí' lazra'?

⁷Da líqueze guzrúnnuja' zítu'la, na' súaqueza' le̱'e̱ xixre' lawe' lataj.

⁸Guna' ba xuzre la' lu be' bdunu', ne lu be' wal-la.

⁹Bzria xi' benne' ca' dxelune̱' da cale̱la, Xran. Bzaga naze da dxelune̱', lawe' da ble'eda' da zrinnaj, ne da cale̱la da dxelune̱' lu xe̱zre.

¹⁰Te zra chizrela dxeledé̱' lawe' ze'e da naxechaj na xe̱zre, ne dxelune̱' da zrinnaj, ne da cale̱la lu xe̱zre nigá.

¹¹Nazrate̱ xe̱zre nigá da cale̱la da dxelune̱', ne tu dxelúnzqueze̱' da we̱n lazre', ne xel-la' dxezí xe̱ lu neza chee̱ na.

¹²La guca tu benne' bénnea' dxedábague̱' neda', bénnea' be̱n le̱' chia', na' bchaga lawa' da na'. La guca tu benne' dxecuídene̱' neda' bénnea' gudábague' neda', na' bcache cuina' lau le̱'.

¹³Lue', bénnea', gucu' ca tu le sa' ljwezra'. Bsi'u neda', ne gucu' tuze neda'.

¹⁴Tu zren bchálajdxu du lázredxu, ne lu xel-la' zri'i lazre' gudadxu lu xu'u lizre Dios.

¹⁵Dios, be̱n que̱la xel-la' gute benne' ca' dxelune̱' da cale̱la chadite̱. Be̱n xelexú'e̱ lu lataj ba xa' zaj naca bane̱', lawe' da nazrate̱ xu'u lizre̱' da cale̱la da dxelune̱'.

¹⁶Ca naca chia' neda', bláwizra' Dios, na' Xrana' Dios bselé̱' neda'.

¹⁷Che zílala, ne wagubizra, ne ca dxebía gubizra guchálajle̱queza' Dios, ne guláwizra' Le̱', na' Le̱' xenne̱' chia'.

¹⁸Xexá'awe̱' bénne'du xu'a lu wedil-la da dxaca chia' neda', ne gune̱' cueza' zri lazra', lácala zaj zra' zánete̱ benne' dxeledábague̱' neda'.

¹⁹Wene Dios, na' guzría xí'queze̱' benne' ca'. Naque̱' Bénnea' zúatequeze̱' dxenná be'e̱ nédxute̱. Caní gune̱' chee̱ benne' ca' lawe' da quebe dxuluché̱'e̱ ca dxelune̱', ne quebe dxelezrebe̱' Dios.