Ola Saam 55:2-19

²Irrim mi en ensim mi. Mi wikwan na brom oldei jinggabat ol main trabul.

³Ol main enami olabat toktok blanga kilim mi, en mi bradin brabliwei na. Mi jidan brabli nogudbinji brom ol detlot enami hu oldei gibit mi adtaim. Olabat oldei meigim trabul kaman langa mi, en olabat oldei wail en heidim mi.

⁴Mi bradin brabliwei, en det filing blanga dai im bradinim mi brabliwei.

⁵Mi bradin nomo lilbit en mi sheiksheik. Mi bradin brabliwei.

⁶If ai bina abum wing wulijim det pijin, ai bina flaiwei blanga faindim pleis blanga abum spel.

⁷Ai bina flai longwei en meigim main kemp langa deset.

⁸Kwikbalawei ai bina faindim main ronwan pleis blanga kipum miselp seifwan brom det strongwan win en bigwan rein.

⁹Bos, yu meigim main enami olabat tok garram difrindifrin langgus, wulijim dei kaan andasten miselp, dumaji mi luk pipul dumbat nogud ting en meigim trabul langa det bigwan taun.

¹⁰Olkain trabul jidan deitaim en naitaim. Im meigim det taun jidan garram mowa nogud ting en trabul.

¹¹Ola nogudbala pipul meigim trabul en dumbat nogudbala ting ebriweya langa det taun. Ola roud jidan garram ola nogudbala pipul hu gibitbat adtaim en dalimbat laiya.

¹²If im bina main enami mokimbat mi, ai bina larram tharran. If im bina main enami tokabat blanga mi praudbalawei, wal ai bina haidim miselp brom im.

¹³Bat im yu, main brabli gud fren! Yu main wekinmeit en yunmi bin oldei jidan mijamet!

¹⁴Yunmi bin oldei toktok gija, en yunmi bin oldei go weshipbat mijamet langa det Serramoni Pleis blanga God.

¹⁵Larram ol main enami olabat binijap kwikbala. Larram olabat godan laibwan langa det pleis blanga ola dedbala pipul. Olabat brabli wikitwan pipul en ola brabli nogudbalawei jidan insaid langa olabat hat, en tharran na meigim olabat kemp brabli nogudwan du.

¹⁶Bat mi jingat langa YAWEI det trubala God blanga album mi, en im garra seibum mi.

¹⁷Ailibala, dinataim en naitaim, mi jingat en toktok langa im blanga main trabul en pein, en im garra irrim mi.

¹⁸Im garra bringimbek mi seifwan brom det bigwan fait langa ol main enami olabat nomeda olabat jidan bigismob.

¹⁹God na, hu jidan bos olagijawan, garra irrim mi en im garra bidim olabat, dumaji olabat nomo wandi tjeinj, en dei nomo gibit im rispek, najing.