SALMOS 55:1-22

¹Bze nag, X̱ana' Dios, da' žḻiža' Le', na' bi wzó' cheḻa'ale da' ẕnnabla' Le'.

²Bebán ḻaže', na' bechebe chia'. Žḻiža' Le' ḻo da' ẕnnia', na' že' zedla'.

³Benne' bi ẕḻe'ele' neda' chawe' ẕnnie' chia', na' bennen' bi nake' chawe' žon ditjle' neda'. Žesbága'gake' neda' ẕia, na' ḻo yeḻa' ẕža'a chégake' ẕbia ḻáže'gake' neda'.

⁴Že' zedle ḻáẕda'wa' ḻo beḻa' žen chia', na' ẕchebe yeḻa' got neda'.

⁵Ẕžébeḻi'a, na' žẕízeḻi'a, na' žak chia' da' ẕcheben neda'.

⁶Wnnía': “Chela' gonno' chia' x̱il ka' ka zej nak x̱il bsia, tia' ḻo be'ze gan yezí' ḻaža'a.

⁷Da' ḻi wẕonnja' zíto'le, na' soakza' ḻe'e latje dach.

⁸Gon byena' bi be gon chia' be' bdone', na' be' waḻe.”

⁹Bžia yi' benne' ka' bi zej nake' chawe', X̱ana' Dios. Bchix̱ da' ẕnnágake', dan' ẕḻe'ela' da' ẕinnj, na' da' ẕia da' žóngake' ḻo yež nga.

¹⁰Dot ža, na' yele žéchjgekle' yež. Žóngake' da' ẕinnj, na' da' bi nak chawe' ḻo yež nga.

¹¹Nža' yež nga da' bi nak chawe' da' žóngake'. Žóntezgake' da' wen ḻaže', na' da' ẕinnj ḻo nez chen.

¹²Chela' gok no benne' bi ẕḻe'ele' neda' chawe', bennen' bene' neda' ẕia, na' bzoelan'. Chela' gok benne' ẕže'e neda', bennen' bdíḻ-ḻene' neda' na' bkache' kwina' ḻawe' ḻe',

¹³san le' benkzon', na' goko' ka to bi' lježa'. Wẕí' ḻo no'o neda', na' goko' toze ḻen neda'.

¹⁴Tẕen bchaḻjžo dot ḻáže'žo, na' ḻo yeḻa' ži'i ḻaže' wdažo ḻo liž Dios.

¹⁵Dios, ben ga sen yeḻa' got benne' ka' choḻze, benne' ka' bi zej nake' chawe'. Ben ga chó'ogake' ḻo yi' gabíl kate' ne zóagake' nbángake'. Nža'gak lížgake' da' bi nak chawe' da' žóngake'.

¹⁶San ka nak chia' neda', bḻiža' Dios, na' X̱ana' Dios beslé' neda'.

¹⁷Zildo', na' wawbíž, na' kate' žen wbíž ẕcháḻjḻena' Dios. Žḻiža' Ḻe', na' Ḻe' ženle' chia'.

¹⁸Yeya'we' be' da' nakkza' ḻo na'gak benne' ka' ẕdíḻ-lengake' neda', na' gone' ga kweza' chawe', ḻa'kze zej nnita' benne' zante, benne' bi ẕḻé'egekle' neda' chawe'.

¹⁹Dios nake' Bennen' zóateze', na' ẕnna biá'teze'. Nake' chawe', na' wžía yi'e benne' ka'. Ki gone' chégake' dan' bi žsángake' da' žóngake', na' bi ẕžébegake' Dios.

²⁰Benne' wen da' ẕinnj ka' ẕdíḻ-ḻengake' benne' ka' ẕgá'nḻengake' ḻégake' chawe'. Ẕží'igake' che diža' da' bénḻengake' benne' ka'.

²¹Da' ẕcháḻjgake' naken diža' cháwe'do', san yo'o yichj ḻáẕdo'gake' yeḻa' ẕža'a. Žóngake' x̱tanḻe'e diža' da' ẕcháḻjgake', san naken ka to ya ntoche'.

²²Bde ywa' chio' x̱kože' X̱anžon' na' Ḻe' gon choche' le'. Batkle we'e latje chejchegw benne' chawen' to chi'ize.