Psalms 55:1-22

¹A Got, mu rung’ag e meybil rog; dab mu pi’ keru’um ko wenig rog!

²Mmotoyil ngog ma ga fulweg lungug; ya ke li’eg e magafan’ rog.

³Ke k’aring e pi to’ogor rog e marus ngog ko thin ni togopluw, kug masengseng ko gafgow ni be tay e pi’in kireb e leam rorad ngog. Yad be girengiy e oloboch nga dakenag; yad be damumuw ngog ma yad be fanenikayeg.

⁴Ku gu rus, doguwen e yam’ e ke dil’iyeg.

⁵Ke koleg e dugow gu be da’da’; ku gum’ ko morus.

⁶Yigi yib pog ni bod e arche ni dove, nggu changeg nga bang nggu pir’eg e gapas.

⁷Gu ra changeg nga bang nib palog, ngu ngongliy tafnag u daken e ted.

⁸Gu ra gur nigeg ngu pir’eg e gin nggu gif ngay ngu chuw ko nifeng ni gel nge yoko’.

⁹A Somol, mu balyangnag e welthin ko pi to’ogor rog! Gu be guy e cham nge wagagay u lan e binaw,

¹⁰ni be liyeg ni rran nge nep’, ma be suguy ko oloboch nge wagagay.

¹¹Gubin yang ni yibe wodmang riy; ke suguy e kireb nge sasalap e yupa’ i kanawo’.

¹²Fa’an mang e ba to’ogor rog e be dariyfan nigeg, mra yag ni nggu k’adan’ug; fa’an mang e ba togopluw rog e be girig ngog, ma gu ra mith rok.

¹³Ma dangay ya gur, ni gadow ngabang, ni gadow nga maruwel ma gadow fager.

¹⁴Ud welyew salpadow ngodow mu ud liyorgow u ta’bang u lan e Tempel.

¹⁵Mang e yigi yim’ e pi to’ogor rog ni dawori taw nga nap’rad; mang e ranod ni kayad bafos nga’ar ko fayleng ko yam’! Ya ba sug gumircha’rad nge lan taferad ko kireb.

¹⁶Machane gu be ning e ayuw ngak SOMOL ni Got, ma bayi ayuwegneg.

¹⁷Kadbul, misiw’, nge nep’ gun’gun’ rog nge gel’gel’ e be yan ngak ngalang, mra rung’ag lungug.

¹⁸Bayi fulwegneg ni dariy ban’en nra buch rog ko pi mael ni gu be tay ngak bo’or e to’ogor.

¹⁹Got, niki i gagiyeg aram ko tobolngin i yib, e ra rung’ag lungug me waer nagrad; ya daburad ni ngar thilgad, ma dariy madgun u wan’rad.

²⁰En immoy nri gamow e ke cham ngak pi fager rok; ke thilyeg e tin ni micheg.

²¹Thin rok e ba munguy ko che’, ma gumircha’en e ba sug ko fananikay; thin rok e bod feni sumnguy e gapgep, machane ma th’abey ni bod yungi saydon nib m’uth.

²²Mu pi’ e gilab rom ngak SOMOL, ma bayi n’ufegem; dariy e ngiyal’ nra pag e pi’in yul’yul’ ngar mo’waergad.