Salmos 37:1-27

¹Dapiyarini wayasi. Tputsimand yutaritshishirini musá tsiyantarinllpa. Tputs yutarit taakana anoo, siysa pakus, Ambtam ashpi átus, támararintspa.

²Watam yutaritshishpan mikeeru pchirukpaz ashkuwa. Karut tamatarparee ashiru mikeeru mawirukiya.

³Ashiriya, tsapurunasush taakus, Apanllimunari mangis tatungtsa; izuururu yutaritshishee mapiyngtsa. Saanaatsi taarashis wanasir ksutangtsa; wanasir taangtsa.

⁴Apanllimunari mangis tatkus, Yuwaa saana chinakus ashchima, átis anoo Apanllsha uru istachiya.

⁵Ashiriya, Apanll waana uwpa putayaru, wanasiripimari siyaa machchiya. Ashiri Apanllimunamari mangis tatungtsa.

⁶Ashkachus, izuuru wanasiriri taakus, zar wachamureetskachu, tuwasintaru ashikpaz ashitssa.

⁷Ashiri mangiptartis wanasir taakus, izuurus Apanlleem k'tangtsa. Watam Apanll siyaa istachuwa. Ashkus, tputs siyaa tayutaritkitaa, anoo ksatarintspa. Waani taachpa. Watam yutarit chinaksin, atanawa.

⁸Ashiri tsiyanis zambazangtsa. Arangeem tsiyantarintspa. Mishat, tsiyanpatis taarintspa. Watam ashkachus, aranginasha saanaatsi tayutaritatssawa.

⁹Apanll yutaritshishpanee tputs kapeetchiya. Itaru, yuwsha tputs Apanllimunari mang' tatku, an urutamari taachiya.

¹⁰Nimun ayamtaatiya yutaritshishpanee pangcheezich. Kapungtaa nachungakuch, nda pangachchee. Izuuru pastachiya.

¹¹Itaru, yuw tputs Apanllee chinakana, an tsapurunasish wipapat, wachinllinuptatam, wanasirimshinandari taachinlliniya.

¹²Yutaritshishpan tputs Apanllchichee kiyung yachamaam chinakanaya. Natsaksin, kiyung yachamaam zandkanaya.

¹³Itaru, Apanllsha yutaritshishpanee; Waani ashtap, atiya, watam yuwash zari waritakchu, izuuru wanichuwa.

¹⁴Ashiriya, yutaritshishpan tputs wáchiruree yáyarusin, Apanllchichee tputs tupantsakanaya. Timbanllizeetssha itintangayarusin, tsak ashchinlliniya. Ashkusin, Apanllchichee tputs pachamaam zandchinllinaya.

¹⁵Itaru, Apanllsha waanpatatam wáchirur waanaatstatam pachachiya. Timbanllzirineetsi izuuru ichipambayaru kasachiya.

¹⁶Apanllchich maacheetsi pakchitaa payuksin, itaru Apanllimunsha kis taakanaya. Yashingchichsha maacheetsi zapan payuktaa, kis taamaam wanindaja.

¹⁷Apanllsha yutaritshishpanee izuuru kapeetchiya. Itaru, wanasirimsheetsinaa tputs zurampatari tapachindachiya.

¹⁸Apanll tputsee wanasirimshi ksutkiya. Taársheetstam tachingkiya. An tputs Apanllush urutari taachinlliniya.

¹⁹Ashiri yuwash yuwariz maringakchu anush Apanllchichinaa tputs marizimun nda kiyung kachiychinlliniya. Watungasheem nda pshatachiya.

²⁰Yashingchich tputs izuuru kurayaru, muchinlliniya. Karutaa puza tirookuch, kurataru ashiru kurachiya. Amb ashkachu, Apanll undarar izuuru pastachiya. Msas ashiru mzeetaru tsípatara ashchinllinaya.

²¹Tputs yashingchich maacheetsi yáyaritaatssin, itaru nda tuwanpukanaya. Itaru, Apanllchichsha maacheetsi yaksin, aranginasha tuwanpukanaya.

²²Yuwaa Apanll tputsee kis napku, anoo tputs watsapun wanasir ksutkiya. Itaru, yuwaatssha nda kis napku, anoo watstamari kapeetchiya. Nda istachiya.

²³Ashiri tputs Apanllee chinaku, Apanllee kuk payuku, anoo Apanll machkiya. Wanungish wanasirimshish machkiya.

²⁴Yashing xarashshee wayaktaa, nda izuuru pantsakiya. Watam Apanllsha uwpat putayaru, tuxiyzakuwa.

²⁵Nuw kanungasimasi taaranguri, itaru natsha wachinayanllina. Apanllee tiptsir uru yasakuri, Apanllsha waanaatsi tiptsir nda minamtiyam kasarangiya. Tiptsireemsha pishtats ndunimuna; tputsish pangaa nda mashtaranaya. Wipaamtamsha katungats nduntam pishtarangiya.

²⁶Ashiriya, tputs Apanllee chinaksin, nayanimpatari taaksin, tputseem mangutari maachiritaa istakiya. Ashirucha, wipshtisin ashiritam tputseem mangutaritam istakitamanaya.

²⁷Ashiri yutaritshishee mapiyngtsa. Saanaatsi wanasir ksutangtsa. Ashkus, waanasirimshee pangatssa. Yap tsap taakamchis anush uru kis taatssa.