SALMOS 25:6-14

⁶Bejsá' ḻaže', X̱ana' Dios, gako' ži'i ḻaže', na' yeyache' ḻáže'lo' neda', kan žónteze žono'.

⁷Bi chejsá' ḻažo'o doḻa' da' bena' kate' ne naka' benne' kwide', na' kan bži'a che x̱tižo'o. Ḻo yeḻa' žeyache' ḻaže' chio', na' yeḻa' ži'i ḻaže' bejsá' ḻaže' neda', X̱ana' Dios.

⁸Chawe', na' ḻi ḻaže' nak X̱anžo Dios. Che ḻen wsedle' benne' doḻa' ka' da' žaḻa' góngake'.

⁹Wḻoe'ele' benne' gax̱jw ḻaže' ka' da' naken chawe' na' wsedle' benne' ẕen ḻaže' ka' da' góngake'.

¹⁰Ḻo yeḻa' žeyache' ḻaže', na' ḻo da' li, ẕche' X̱anžon' benne' ka' žóngake' kan ẕnna x̱tiže'e dan' bénḻene' žo'o, na' ka nak da' žsedle' Ḻe'.

¹¹Dan' žono' ka nak da' ba wnnó', X̱ana' Dios, yenít ḻawo' chia' doḻa' da' bena', da' naken ẕen.

¹²¿Zoa no benne' ẕžebe' Le', X̱anto' Dios? Le' wsedlo' bennen' da' žaḻa' gone'.

¹³Gak chie' to yeḻa' ba nez ẕen, na' ẕa'sóe' ka' gata' chégakbe' yežlyó.

¹⁴X̱anžo Dios nake' toze ḻen benne' ka' ẕžébegake' Ḻe', na' gone' ga gónbia'gake' x̱tiže'e dan' bénḻene' žo'o.