SALMOS 22:5-24

⁵Bḻížgake' Le', na' gókḻeno' ḻégake'. Bx̱en ḻáže'gake' Le', na' bi bedoé'egekle',

⁶san neda' naka' ka to bel góna'do', na' kege benne'. Ẕža'agak benne' ka' neda' na' žon dítjgekle' neda'.

⁷Yógo'te benne' ka', kate' ẕḻé'egekle' neda', ẕká'ngake' neda' ka'ze. Žsáljwgake' žóa'agake' nich nnégake' chia', na' ẕta yíchjgake', na' ẕnnágake':

⁸“Bx̱en ḻaže'e X̱anžon' nich yeslé' ḻe'. Yeslé' ḻe' cha' žaz ḻaže'e ḻe'.”

⁹San Le', X̱ana', bex̱o' neda' kate' golja'. Beno' ga bx̱en ḻaža'a Le' kate' ne žaẕa'a.

¹⁰Wyoá'a ḻo no'o kate' bi na' galja'. Kate' ne yoa'a ḻe'e x̱na'a, báchekze nako' Dios chia'.

¹¹Bi yebigo'o gan zoa' dan' zoa gawze da' wsakan' neda', na' bi zoa no benne' gákḻene' neda'.

¹²Benne' ka' bi ẕḻé'egekle' neda' chawe' zej nyechjle' neda', benne' ka' zej nake' ka bež ka'. Zej nyechjle benne' ka' neda', benne' ka' zej nake' ka bež waḻe ka' che yežlyó Basán.

¹³Gónegekle' wžía yí'gake' neda' ka žon to bež yix̱e', bia ẕdonba', na' ẕbéžeya'aba'.

¹⁴Bedó ḻaža'a, na' gok ḻáẕda'wa' ka nis da' nlaljen, na' yógo'te žit yoa'a bsángaken ljéžgaken ka'. Ḻáẕda'wa' goken ka china' bez, da' beyonan ḻi'a ka nis.

¹⁵Beyák yeḻa' waḻe chia' ka to že'n yo dan' nla'an, na' loža'a wdán' chichjla'. Bletjo' neda' ḻo bix̱te yo che yeḻa' got.

¹⁶Zej nyechjle benne' wen da' ẕinnj ka' neda'. Zej nyechjle' neda' ka beko' ka'. Wdídjwgake' ni'a na'a.

¹⁷Wak wlaba' yógo'te žit yoa'a, na' benne' ka' ẕḻé'egeklen', ẕwíazegake' neda'.

¹⁸Bdísgake' ẕa' che chégake', na' ḻawle ẕan' wléjgake' da' gak bian'.

¹⁹San Le', X̱ana' Dios, bi bkwaso' gan zoa'. Nakkzo' Le' yeḻa' waḻe chia', na' gákḻeno' neda'.

²⁰Beslá be' da' nakkza' ḻo na' benne' wdíe' neda' ya ntoche'. Bennen' žénele' wžía yi'e neda' žone' ka žon to beko'.

²¹Beslá neda' ḻo žoa'a bež yix̱e'. Beslá neda' ḻo lozgak bež waḻe ka'.

²²Wzenla' bi' ljéža'do' ka' kan nako' Le'. Wká'n ẕenkza' Le' gachje ḻawle benne' ka' zej ndobe' chio' Le'.

²³Ḻe'e, benne' ka' ẕžébele X̱anžon': ¡Le wká'n ẕene' Ḻe'! ¡Le wká'n ẕene', ḻe'e, ẕa'só Jakob! ¡Le žebe Ḻe', ḻe'e, ẕa'só Israel ka'!

²⁴Bi ẕnnita' Dios benne' yache' ka' cheḻa'ale, na' bi ẕdeze' da' ẕzáka'gake', na' bi ẕkache' ḻawe' ḻawgak benne' ka', san kate' žḻížgake' Ḻe', ženle' chí'igake'.