SALMOS 22:1-18

¹Dios chia', Dios chia', ¿biẕ chen' wléj yichjo' neda'? ¿Biẕ chen' bi ženlo' kate' ẕnnabla' Le' yesló' neda'?

²Dios chia', žḻiža' Le' tža tža, san bi žechebo' chia'. Žḻiža' Le' žel, na' bi žezí' ḻaža'a,

³san Le' nako' la'y. Ẕbezkzo' gan ẕka'n ẕengak benne' Israel ka' Le'.

⁴X̱a x̱na' wdé cheto' ka' bx̱en ḻáže'gake' Le'. Bx̱en ḻáže'gake', na' besló' ḻégake'.

⁵Bḻížgake' Le', na' gókḻeno' ḻégake'. Bx̱en ḻáže'gake' Le', na' bi bedoé'egekle',

⁶san neda' naka' ka to bel góna'do', na' kege benne'. Ẕža'agak benne' ka' neda' na' žon dítjgekle' neda'.

⁷Yógo'te benne' ka', kate' ẕḻé'egekle' neda', ẕká'ngake' neda' ka'ze. Žsáljwgake' žóa'agake' nich nnégake' chia', na' ẕta yíchjgake', na' ẕnnágake':

⁸“Bx̱en ḻaže'e X̱anžon' nich yeslé' ḻe'. Yeslé' ḻe' cha' žaz ḻaže'e ḻe'.”

⁹San Le', X̱ana', bex̱o' neda' kate' golja'. Beno' ga bx̱en ḻaža'a Le' kate' ne žaẕa'a.

¹⁰Wyoá'a ḻo no'o kate' bi na' galja'. Kate' ne yoa'a ḻe'e x̱na'a, báchekze nako' Dios chia'.

¹¹Bi yebigo'o gan zoa' dan' zoa gawze da' wsakan' neda', na' bi zoa no benne' gákḻene' neda'.

¹²Benne' ka' bi ẕḻé'egekle' neda' chawe' zej nyechjle' neda', benne' ka' zej nake' ka bež ka'. Zej nyechjle benne' ka' neda', benne' ka' zej nake' ka bež waḻe ka' che yežlyó Basán.

¹³Gónegekle' wžía yí'gake' neda' ka žon to bež yix̱e', bia ẕdonba', na' ẕbéžeya'aba'.

¹⁴Bedó ḻaža'a, na' gok ḻáẕda'wa' ka nis da' nlaljen, na' yógo'te žit yoa'a bsángaken ljéžgaken ka'. Ḻáẕda'wa' goken ka china' bez, da' beyonan ḻi'a ka nis.

¹⁵Beyák yeḻa' waḻe chia' ka to že'n yo dan' nla'an, na' loža'a wdán' chichjla'. Bletjo' neda' ḻo bix̱te yo che yeḻa' got.

¹⁶Zej nyechjle benne' wen da' ẕinnj ka' neda'. Zej nyechjle' neda' ka beko' ka'. Wdídjwgake' ni'a na'a.

¹⁷Wak wlaba' yógo'te žit yoa'a, na' benne' ka' ẕḻé'egeklen', ẕwíazegake' neda'.

¹⁸Bdísgake' ẕa' che chégake', na' ḻawle ẕan' wléjgake' da' gak bian'.