Salmos 145:5-19

⁵Nuwsha urutamari shiyaa chinachintar ashkuri taachina. Shiy kizpur wanasir 'sinish taaksha. Mishat, iyaa uru ksutkush kizpur taaksha.

⁶Tputs ztaru shiyaa uru ungirtaksin, waanpataatssin kamanimantar ashchinllinaya. Nuwsha ashchitamana. Apanll ¿wanip wizpurpa iyashchee istaranga? nuwsha uru táchtamana.

⁷Mishat, tputssha, Apanll iyaa ksumish chinakiya. Iyaa ichingurootsini tatsamooru ksutkiya, yaseeksin táchinllinaya.

⁸Watam Taarashipanee, shiy kchinamishshawa. Nayanimpantishcha. Nda musá tsiyantakush, uru iyaa nayaniksha.

⁹Tputsee ichinguru tatsamooru chinaksha. Ichinguroo istaksha. Tínamareetsish ichinguru ksutkush taaksha.

¹⁰Yuw shiy tínarangish an ichinguru shiyamun kis taakanaya. Mishat, tputsiritamtish, shiyamun shambatchinllinaya.

¹¹Iy kurakarini kizpur wanasircha. Waamari kasiru taakiya, táchinllinaya

¹²Tsapurunasshuchee tputs yasashpatish mangoo p'tseekush, mang' ksachinllinaya. ¡Apanll wizpurpa wanasir tuwasineerangu, atusin mang' ksachpasinaya!

¹³Shiyamari Apaa, kizpur kurak kasirush, tsapurunasish urutamari taaratartachsha. Shiyachich ayamamtiyam pastacheeja, ndambaree.

¹⁴Tputsirish kiyung kachiykitaatssin, waanaatsee tapachindamaam pinasaku, shiysha Apaa, nayanikush istaksha. Undarar kiyung yachaksin, shiysha Apaa, tapachindaksha.

¹⁵Tsapurunasshuch ichingarusin, katungpani atusin, watungasheem shiyaam kutakanaya. Watam shiy uru panakshawa. Yuwash zari waritakchu, maachi kayanakchu, pusayarusin, katungkanaya.

¹⁶Watam shiy Apaa, kuwiptish tputseem kchitamaam panakshawa.

¹⁷Apaa, uru itsinsaru tputsee natstayarush, ksutaksha. Nayanimpatari tputsee istaksha.

¹⁸Tputs shiyaa itsinsaru mashku, Istanda, tákchu, shiysha uru mazinaksha. Watam nda arap taakshawa.

¹⁹Shiyamun Apaa, mang' tatkusin, shiysha uru istakush, mapiyrsin taakanaya. Apaa, istangandama; sitatstee. Maachee yutamash kasikchindama, tákchusin, shiysha mazinakchush, tapachindaksha.