A Umana Kakailai 145:5-19

⁵Ina nununuk ure kaum potar na minamar ma kaum ngala na kini; Ma ure kaum lavur enana papalum.

⁶Ma ra tarai diat a tatata ure kaum lavur enana mangamangana ba dia burut i tana, Ma ina varvarvai ure kaum lavur ngala na papalum.

⁷Diat a tatata ka ure kaum ngala na varmari, Na taorong kadia kakailai ure ra takodo na maukuam.

⁸Ra Luluai a tena varmari, i buka ma ra varmari; Pa i kankan lulut. ma i peal kana varmari ta.

⁹Ra Luluai i mari ra lavur magit par; Ma kana bala na varmari i tadatadav ra lavur mangana i ga vaki diat.

¹⁰A lavur mangana ba u ga vaki diat diat a tul tar ra pite varpa piram, Luluai; Ma kaum lavur tena lotu diat a manane u.

¹¹Diat a tata ure ra minamar i kaum varkurai, Ma diat a pirpir ure ra ongorim;

¹²Upi diat a vaarike tar kana lavur enana mangamangana ta ra tarai, Ma ra enana minamar i kana varkurai.

¹³Kaum varkurai a varkurai ba na tur vatikai ma pa na mutu, Ma kaum varkurai na tur vatikai pire ra lavur taun tarai.

¹⁴Ra Luluai i tukatukal diat par dia papait na bura, Ma i vatut diat ba dia ki ma ra tinabun.

¹⁵A lavur mangana dia ki pa u, Ma u tabatabar diat ma ra adia magit ta ra e ba i topa ia.

¹⁶U pala ra limam, Ma u tabar vamaur ra lavur launa mangana ma kaum varmari.

¹⁷Ra Luluai i dovot ta kana lavur mangamangana, Ma i varmari ta kana lavur papalum.

¹⁸Ra Luluai i ki ravie diat par dia kail ia, I ki ravie diat par dia kail ia ma ra dovotina.

¹⁹Na pait ot pa ra mamainga kadiat dia ru ia, Ma na valongore bula kadia kinail, ma na valaun diat.