SALMOS 135:13-21

¹³X̱anto' Dios, to chi'ize zoa La la'y chio'. Chejsá' ḻáže'tezgak benách ka' Le'.

¹⁴X̱anžo Dios ẕchi'a ḻaže'e benne' chie' ka'. Žeyache' ḻáže'le' žo'o, wen žin chie' ka'.

¹⁵Lo'a ka' chegak benne' zi'to' ka' zej naken ya oro, na' ya plat. Zej naken da' ka' bengak benne' ka'.

¹⁶Zej de žoá'agaken san bi ẕnnégaken. Zej de yej ḻáwgaken san bi ẕḻé'egeklen.

¹⁷Zej de nággaken san bi žéngeklen, na' bi zóagaken nbángaken.

¹⁸Benne' ka' žóngake' lo'a ka' zej nake' kan nákgaken. Ḻezka' zej nak benne' ka' žx̱en ḻáže'gake' ḻégaken.

¹⁹Ḻe'e, benne' ẕa'só Israel, ¡le wká'n ẕen X̱anžo Dios! Ḻe'e, benne' ẕa'só Aarón, ¡le wká'n ẕen X̱anžo Dios!

²⁰Ḻe'e, benne' ẕa'só Lebí, ¡le wká'n ẕen X̱anžo Dios! Ḻe'e, nol-le ẕžébele X̱anžo Dios, ¡le wká'n ẕen X̱anžo Dios!

²¹Ḻe'e zoale yež Sión, ¡le we ḻaw X̱anžo Dios, Bennen' zoakze' yež Jerusalén! ¡Ga'n ẕen X̱anžo Dios!