Salmos 119:120-176

¹²⁰Dxezrize be̱la' dxen chia' lawe' da dxezreba' Lue', ne dxezreba' da dxuchi'u chee̱ntu' da naca na xrlátaje.

¹²¹Ba be̱na' ca da nuchi'u chee̱ntu', ne ca naca da xrlátaje. Quebe gudéu' neda' lu na' benne' ca' dxuluchínene̱' neda'.

¹²²Guche̱be lazre' chia' gunu' gaca chawe' chia'. Quebe gu'u lataj benne' ca' dxulucá'ana szren cuine̱' xuluchínene̱' neda' xadía.

¹²³Guzé̱ bxrinne xiaj lawa' lawe' da dxebeza' xidu' guseláu' neda', ne guchi'u chee̱ntu' ca dxenná xrtizru'.

¹²⁴Dute̱ xel-la' dxexache lazre' chiu' be̱n gaca chawe' chia' neda', we̱n zrin chiu', ne bse̱de neda' guna' ca naca xrba chiu'.

¹²⁵Naca' we̱n zrin chiu'. Bzéajni'i neda' chee̱ gúnbe'a da dxuse̱de dizra' chiu' netu'.

¹²⁶Xrana' Dios, ba bzrin zra bi gunu', lawe' da ba buluzúe̱' chalá'ala da bdxixruj be'u.

¹²⁷Chee̱ le̱ na' neda' nazrí'idxeda' da bdxixruj be'u Lue' quézcala oro, ne quézcala galega oro.

¹²⁸Chee̱ le̱ na' dxéqueda' zaj nácadxa li lazre' da bdxixruj be'u ca xúgute̱ da de̱, na' dxecuídeda' xúgute̱ da zaj naca na da we̱n lazre'.

¹²⁹Dxebánentu' ca dxuse̱de dizra' chiu' netu'. Chee̱ le̱ na' du lazra' tu dxúnzqueza' ca dxenná na.

¹³⁰Gate nu dxuzájla'a ca naca xrtizru', dxusaní na. Dxun na dxeléajni'i benne' dxexruj lazre' ca'.

¹³¹Guxá dxu'a, ne gucá'a lazra' lawe' da dxezá lazra' gúnbe'a da bdxixruj be'u.

¹³²Gunná' neda', ne bexache lazre' neda', ca tu dxúnzquezu' chee̱ benne' ca' zaj nazrí'ine̱' Lue'.

¹³³Be̱n tu gúnzqueza' ca dxenná xrtizru', ne quebe gu'u lataj da zrinnaj nna be'e na neda'.

¹³⁴Bselá neda' lu na' benne' xichaj zra'a ca', na' tu gúnzqueza' ca dxenná da bdxixruj be'u.

¹³⁵Be̱n gaca chawe' chia' neda', we̱n zrin chiu', ne bse̱de neda' guna' ca zaj naca xrba chiu' ca'.

¹³⁶Nisa gudxezra' guca na ca tu xe̱gu nisa lawe' da quebe dxelún bénneache ca bdxixruj be'u.

¹³⁷Xrana' Dios, xrlátaje nacu' Lue', ne li lazre' naca ca dxuchi'u chee̱ntu'.

¹³⁸Da dxuse̱de dizra' chiu' netu', da na' bzu' lu na'ntu', naca na da li, ne da li lazre'.

¹³⁹Dxedú lazra' lawe' da dxé'le̱'a gunne xue lawe' da gulal-la lazre' benne' ca' dxeledábague̱' neda' ca zaj naca xrtizru'.

¹⁴⁰Du lázrele̱'e̱ naca xrtizru', na' nazrí'ida' neda' na, naca' we̱n zrin chiu'.

¹⁴¹Dxexruj lazre' naca', na' dxuluzúe̱' neda' chalá'ala, na' quebe ne gal-la lazra' da bdxixruj be'u.

¹⁴²Tu chí'izqueze zua da dxuchi'u chee̱ntu', na' da li naca da bdxixruj be'u.

¹⁴³Da dxezaca zi'a, ne da ste̱be zua' zaj nuchuchuj na neda', san dxezaca ba lázrele̱na' da bdxixruj be'u.

¹⁴⁴Tu chí'izqueze naca li lazre' da dxuse̱de dizra' chiu'. Bzéajni'i neda', na' gaca bana'.

¹⁴⁵Dute̱ lázrdawa' dxuláwizra' Lue', Xrana' Dios. Be̱n gaca chawe' chia', na' tu gúnzqueza' ca dxenná xrba chiu'.

¹⁴⁶Dxuláwizra' Lue'. Bselá neda', na' tu gúnzqueza' ca dxuse̱de dizra' chiu' netu'.

¹⁴⁷Bálala dxasa', na' dxuláwizra' Lue'. Dxebeza lazra' gaca ca dxenná xrtizru'.

¹⁴⁸Dxenná'aza' bedú xe̱la, chee̱ gulaba lazra' da bdxixruj be'u.

¹⁴⁹Dute̱ xel-la' dxexache lazre' chiu' bene chi'a. Xrana' Dios, da bchi'u chee̱ntu' btipa lazra'.

¹⁵⁰Benne' dxeláu zi' xuzre̱' neda' ba zaj zre̱'e̱ xelune̱' chia' da cale̱la. Zaj nusane̱' da dxenná da bdxixruj be'u.

¹⁵¹Xrana' Dios, zu' Lue' gagu naga zua', ne da li zaj naca xúgute̱ da bdxixruj be'u.

¹⁵²Gate nate ba núnbe'a da dxuse̱de dizra' chiu' netu', da na' nuzú' chee̱ntu' tu chí'izqueze.

¹⁵³Gunná' xque ca dxezaca zi'a, ne bselá neda' lawe' da quebe ne gal-la lazra' da dxenná da bdxixruj be'u.

¹⁵⁴Beche̱be waláz chia', ne bexa'u neda'. Btipa lazra' nen xrtizru'.

¹⁵⁵Sté̱bele̱'e̱ naca xelelá benne' ca' dxelebéaj xíchaje̱' Lue', Dios, lawe' da quebe dxelebé'e̱ gunne xue xelune̱' ca naca xrba chiu'.

¹⁵⁶Xrana' Dios, dxexache lázrele̱'u bénneache chiu'. Btipa lazra' cáte̱ze dxenná xrtizru' gunu'.

¹⁵⁷Zánete̱ zaj naca benne' ca' zaj nau zi' xuzre̱' neda', ne benne' ca' dxeledábague̱' neda', san quebe ne gusana' dxuna' ca dxuse̱de dizra' chiu' netu'.

¹⁵⁸Ble'eda' benne' ca' dxelún lazre̱', na' dxegúteda' benne' ca' lawe' da quebe dxelune̱' ca dxenná xrtizru'.

¹⁵⁹Gunná'xque, Xran, ca nazrí'ida' da bdxixruj be'u. Dute̱ xel-la' dxexache lazre' chiu', btipa lazra'.

¹⁶⁰Da líqueze zaj naca xúgute̱ xrtizru', ne tu chí'izqueze zaj naca da dxuchi'u chee̱ntu' lu da xrlátaje chiu'.

¹⁶¹Benne' ca' dxelenná be'e̱ dxeláu zi' xuzre̱' neda' na' quebe bi nuna' chee̱'. Dute̱ lázrdawa' dxezreba' ca zaj naca xrtizru'.

¹⁶²Dxebéle̱'e̱da' lu da dxenná xrtizru' ca dxebé bénnea' dxezrél-lene̱' tu xel-la' gunní'a zrente̱.

¹⁶³Dxecuídeda', ne dxegúteda' da we̱n lazre'. Nazrí'ida' da dxenná da bdxixruj be'u.

¹⁶⁴Gazre lasa tu zra dxue lá'ana' Lue' lawe' da xrlátaje naca ca dxuchi'u chee̱ntu'.

¹⁶⁵Dxelebeza zri lázrele̱'e̱ benne' ca' zaj nazrí'ine̱' da bdxixruj be'u, na' quebe bi de̱ da gun na cheajlecházie̱'.

¹⁶⁶Xrana' Dios, dxebeza' Lue' xidu' guseláu' neda', ne tu dxúnzqueza' ca naca da bdxixruj be'u.

¹⁶⁷Dute̱ lázrdawa' tu dxúnzqueza' da dxuse̱de dizra' chiu' netu', ne nazrí'ile̱'e̱da' ca naca na.

¹⁶⁸Tu dxúnzqueza' ca naca da bdxixruj be'u, ne ca dxuse̱de dizra' chiu' netu' lawe' da dxelé'equeznu' xúgute̱ da dxuna'.

¹⁶⁹Xrana' Dios, bene da dxuláwizra' Lue'. Bzéajni'i neda' ca dxenná xrtizru' gunu'.

¹⁷⁰Bene da dxenaba' lau Lue'. Bselá neda' ca dxenná xrtizru' gunu'.

¹⁷¹Tu güe lá'anazqueza' Lue', Xran, gate ba nusé̱denu' neda' guna' ca naca xrba chiu'.

¹⁷²Tu guchálajzqueza' ca naca xrtizru' lawe' da xrlátaje naca ca dxenná be'enu' netu'.

¹⁷³Guzúate̱queze gácale̱nu' neda' lawe' da dxuna' ba xuzre guna' ca bdxixruj be'u.

¹⁷⁴Dxezá lazra' guseláu' neda', Xrana' Dios. Dxezaca ba lázrele̱na' da bdxixruj be'u.

¹⁷⁵Be̱n gaca bana', na' güe lá'ana' Lue', na' da dxuchi'u chia' xelácale̱ na neda'.

¹⁷⁶Gudéa' chalá'ala ca dxedá tu zrila' naníteba'. Bexilaj neda', we̱n zrin chiu', lawe' da quebe ne gal-la lazra' da bdxixruj be'u.