Psalm 119:120-176

¹²⁰I kin masak komui, i me i kin muserereki, o i kin masak omui kadeik kan.

¹²¹I kin apapwali me inen o pung; kom der kotin pang ia lang ren me kin wia sued ong ia.

¹²²Sauasa sapwilim omui ladu o kamaitala i; me aklapalap akan ender sued ong ia.

¹²³Por en mas ai inong iong omui kamaur ia, o omui inau pung.

¹²⁴Wia ong sapwilim omui ladu duen omui kalangan, o kotin padaki ong ia omui kusoned akan.

¹²⁵Ngai sapwilim omui ladu; kotin padaki ong ia, pwe i en dedeki sapwilim omui kadede kan.

¹²⁶Ansau leler, me Ieowa pan kotin wiawia; pwe irail kawela sapwilim omui kapung.

¹²⁷I me i kin pok ki ong sapwilim omui kusoned akan, sang kold o kold lingan.

¹²⁸I me i kin kasampwaleki sapwilim omui kusoned akan karos, i tata ki al en likam karos.

¹²⁹Omui kadede kan meid kapuriamui, i me mongiong, i apapwali kin ir.

¹³⁰Ma omui masan pan sansalada, a pan kareda peren o lolekong ong me opampap akan.

¹³¹Au ai kin sar pasang o inong iong sapwilim omui kusoned akan; pwe i kin anane ir.

¹³²Kom kotin wukedoke dong ia, o maki ong ia, duen me kom kin wiai ong ir, me pok ong mar omui.

¹³³Kotin kainenela al ai nan sapwilim omui masan, o der mueid ong, me sued kot en wiawia ia.

¹³⁴Kotin dore ia la sang mor sued en aramas akan, a i ap pan kolekol omui kusoned akan.

¹³⁵Kotin kamarainiki omui ladu silang omui, o kotin padaki ong ia duen omui kusoned akan.

¹³⁶Por en mas ai me dir en pil, pweki ar sota peiki ong omui kapung.

¹³⁷Maing Ieowa, komui me kotin pung, o omui kusoned akan me pung.

¹³⁸Komui me kotiki ong kit er kadede pan omui pung o melel, pwe i en nantiong kapwaiada.

¹³⁹I insensued melel, koren iong mela, pweki ai imwintiti kan monokela omui masan akan.

¹⁴⁰Omui masan meid makelekel, o sapwilim omui ladu kin pok ong.

¹⁴¹Ngai me tikitik o me mal amen, a i sota kin monokela omui kusoned akan.

¹⁴²Omui pung me pung soutuk eu, o omui kapung me melel.

¹⁴³Masak o apwal lel dong ia; omui kusoned akan ai peren.

¹⁴⁴Pung en sapwilim omui kadede kan me soutuk, padaki ong ia, i ap pan memaur eta.

¹⁴⁵I ngidingid sang nan mongiong i; Ieowa kom kotin mangi ia! I pan apapwali omui kusoned akan.

¹⁴⁶I likwir wong komui, kom kotin sauasa ia, a i ap pan kolekol omui kadede kan.

¹⁴⁷Nin soran i kodo o ngidingid; i auiaui omui masan.

¹⁴⁸I kin pirida ni ailep en pong, pwen madamadaua duen omui masan.

¹⁴⁹Ereki ngil ai duen ar kalangan; Maing Ieowa, kamaur ia da duen omui kusoned akan.

¹⁵⁰Ai imwintiti sued akan koren iong ia, a re doo sang sapwilim omui kapung;

¹⁵¹Maing Ieowa, komui me koren iong ia, o omui kusoned akan karos me melel.

¹⁵²I asa sang mas o, me komui kasonedier sapwilim omui kadede kan, pwen potopot eta.

¹⁵³Kom kotin irerong ai luet, o kamaio ia da! Pwe i sota monokela omui kapung.

¹⁵⁴Kotin apapwali ia, o dore ia la, o kamaur ia da duen omui inau.

¹⁵⁵Me doo sang Kot akan kin doo sang maur, pwe re sota kin isenoki omui kusoned akan.

¹⁵⁶Omui kalangan meid laud, Maing Ieowa; kom kotin kamaur ia da duen omui kusoned akan.

¹⁵⁷Me pakipaki ia, o palian ia me toto; ari so, i sota wuk wei sang omui kadede kan.

¹⁵⁸I kin kilekilang me mor sued akan, ap pokela, o i kin suedeki, pwe re sota kin peiki ong omui kusoned o.

¹⁵⁹Kotin masando, me i kin pok ong sapwilim omui kusoned akan; Maing Ieowa, kotin kakel ia da, duen omui kalangan.

¹⁶⁰Omui masan me dir en melel, o masan en omui kapung pan duedueta.

¹⁶¹Saupeidi kan kin masamasan ia ni sokarepa; a mongiong i kin masak omui masan akan.

¹⁶²I kin peren kida omui inau dueta amen, me diaradar pai kasampwal eu.

¹⁶³I kailongki likam o suede kin irail, a i kin pok ong sapwilim omui kapung.

¹⁶⁴Pan ise pak i kin kapinga komui ni ran ta ieu, pweki kusoned en omui kapung kan.

¹⁶⁵Me kin pok ong sapwilim omui kapung, kin popol melel, re sota pan salongala.

¹⁶⁶Maing Ieowa, i kin auiaui omui kamaur, o i kin peiki ong sapwilim omui kusoned akan.

¹⁶⁷Mongiong i kin kolekol sapwilim omui kadede kan, o kin pok ong irail melel.

¹⁶⁸I kin kolekol sapwilim omui kusoned o kadede kan, pwe al ai kan karos me sansal mo ’mui.

¹⁶⁹Maing Ieowa, kotin mangi ai ngidingid, o kotin padaki ong ia duen omui masan.

¹⁷⁰Re kotin mangi ai kapakap, o dore ia la duen omui inau.

¹⁷¹Komui lao padaki ong ia omui kusoned akan, kil en au ai ap pan kapinga komui.

¹⁷²Lo i pan kauleki duen omui masan, pwe omui kusoned akan karos me pung.

¹⁷³Lim omui en sauasa ia, pwe i piladar omui kusoned akan.

¹⁷⁴Maing Ieowa, i kin inong iong omui kamaur, o i kin peren kida omui kapung.

¹⁷⁵Kom kotin ieiang ngen i, pwen memaur eta ap kapinga komui, o lim omui pali maun en sauasa ia.

¹⁷⁶Ngai ras ong sip amen me sansalong sili o salongala; kom kotin rapaki sapwilim omui ladu, pwe i sota monokela omui kusoned akan.