Salmo 86:12-17

¹²Nengazen he Megbevayè ku, edeliǥen ku sikew te kedalig he ebpuun kayi te tivuuk he ǥehinawa ku. Edeliǥen ku sikew te wazà pidtemanan.

¹³Su utew a kenikew mibmahal; midlibri a kenikew te kemetayen.

¹⁴He Megbevayà, edsurungen a te gelbuwen he menge etew su edhimetayan e zan. Mesipala sikandan ne wazè dan mekekilala kenikew.

¹⁵Piru sikew, Nengazen, hihizuwen ka wey veliǥeǥawen ka he Megbevayà. Beliǥeǥawen ka wey metinumanen, ne kenè ka melemu he egkepauk.

¹⁶Seǥipaa a wey kehizuwi a; beǥayi a te zesen nu ne libriya a is suluǥuen nu.

¹⁷Ipetuusi nu kayi te kediey is keupiya nu su wey mepeel-elezi is menge kuntada ku ke egkeehè dan haazà. Su iyan ka, Nengazen, edtavang wey ebeǥey kedì te kelipey.