SALMOS 86:12-17

¹²TOTECO Dios, nimitzpaquilismacas ica nochi noyolo huan nimitzhueyitlalis para nochipa,

¹³pampa tlahuel hueyi motlaicnelilis noca na, huan amo quema tlami. Ta techmanahuijtoc para amo niyas mictla campa tlanahuatía miquilistli.

¹⁴Toteco Dios, miyac masehualme catli mohueyimatij huan catli mosisiníaj motlanantoque para nechhuilanase. Huan miyac tlahuilanca masehualme huan tlaixpanoni quinequij nechmictise, huan amo monejnehuilíaj tlen ta.

¹⁵Pero ta Toteco nelía titetlasojtla huan hueyi moyolo. Amo nimantzi ticualani. San ta titeicnelía huan san ta timelahuac.

¹⁶Techtlachili ica miyac tlaicnelijcayotl huan techmaca chicahualistli na nimotequipanojca. Huan xijmanahui icone mosihua tequipanojca.

¹⁷Xijnexti se tlanextili para ta techcualita. Quej nopa quiitase nocualancaitacahua, huan mopinahuase pampa momacase cuenta para ta, TOTECO, tlahuel techpalehuía huan techyoltlalía.