SALAMO 86:12-17

¹²Ḡaubada Dirava e, lau oi na hanamomumu mai lalogu idoinai ida, oi ladamu baina imodaia hanaihanai.

¹³Badina be emu hebogahisi na bada egu ai, lau laumagu na mase ena dobu gabudia amo vada o hamauria.

¹⁴Dirava e, hekokoroku taudia vada e tuari henigu; daḡedaḡe taudia ese lauegu mauri iabi-ohona dalana e tahuamu, oi asie atomu lasi idia vairadiai.

¹⁵A Ḡaubada e, oi na hebogahisi bona harihari-bada Diravana, emu badu e halahemu emu hebogahisi bona emu heabidadama na bada herea.

¹⁶A haḡeregu, a bogagu hisi; emu goada na emu hesiai tauna na henia, emu hesiai hahinena natuna ba hamauria.

¹⁷Emu lalo-namo toana ta ba hahedinarai henigu, bena e inai henigumu taudia na bae itaia, bona bae hemarai; badina be, Iehova e, oi ese vada o durugu, bona taugu vada o haloa.