Salmo 74:7-21

⁷Dinadael dan Timplom ya pinooan da, inpakadodogis da din pandaydayawan di ipogaw en sik-a.

⁸Nantotolagan da ay amin kami yan peslen da, amin ay pandaydayawan di ipogaw en Diyos yan pinooan da.

⁹Ed wani yan magay mamadto ya magay mailas milagro, kas-ano pay di kabayag nina, Apo?

¹⁰Pig-an ay somaldeng din kalaban mo ay manis-iyek en sik-a ya manglaslasoy sin ngadan mo?

¹¹Apay nga gomiginek ka ay adi kan dosaen daida?

¹²Ngem sik-a ay Diyos din ari mi manipod pay ed idi, namin ado ay insalakan mos dakami isnan daga mi.

¹³Nansianem din baybay babaen sin nakaskasdaaw ay panakabalin mo. Din toktok di kaeegyat ay animal sin baybay yan tinegmil mo.

¹⁴Tinegmil mo din toktok di animal ay makwani en Leviatan, inpakan mon awak na sin aanimal sin lugar ay kadardaratan.

¹⁵Din danom sin obbog yan inpabalam, ngem pinamagam abe din danom sin adi katkatdok ay ginawang.

¹⁶Inpawadam di labi ya kaagawan, pinarsuam di maninggaw ay agew ya bowan.

¹⁷Inkeddeng mo din beddeng di daga, din tiyagew ya deam yan inkeddeng moy timpo da.

¹⁸Nemnemem, Apo, ay sis-iyekan daka sin mangonkontra en sik-a. Naong-ong da yan laslasoyen das sik-a.

¹⁹Adim ipalobos ay paligaten din kalaban da din ipogaw mo ay kalapati di kaiarigan da, adi ka linglinglingan daida.

²⁰Din intolag mon dakami, nemnemem koma, tan pag laway am-amagen da sin amin ay mabolinget ay solin di daga.

²¹Adim ipalobos ay din mapalpaligat yan maibabain da, din nabiteg ya kakkaasi, daydayawen daka koma.