Salmo 68:12-27

¹²Kanan da, “Din aari ya sosoldado da yan linmayaw da!” Din babbabai ay mantees beey yan panbibingayan da din nataynan ay sanikwa.

¹³Mo tomalna kasin di biyag di Israelita yan wada da ay man-ib-ibbay sin kad-an di karnero da, napintas ay kalapati di kaiarigan da, kaman nam-es si balitok din dotdot na ya mankoniniing ay palata din payak na.

¹⁴Diyos ay Manakabalin Am-in, din aari yan en ka nansisianen, kaman andap sin dontog ay Zalmon.

¹⁵Dakdake ay dontog ed Basan ay ad-adoy toktok na.

¹⁶Sik-a ay dontog ay ad-adoy toktok na, apay nga maapal ka sin dontog ay pinilin Diyos ay panteana? Mantees di si eng-enggana.

¹⁷Mo emey ka ay Diyos sin nasantoan ay beey mo, mapo da ed Sinai ay kakoyog mo di kalisam ay niliblibo.

¹⁸Idi nantikid ka ay emey ed ngato, inkoyog moy ad-ado ay inabak mo. Inawat moy sagsagot ay napo sin mangonkontra en sik-a ta makitee ka en daida.

¹⁹Madaydayaw ka ay Diyos ay mangisalakan en dakami, inag-agew ay bakbakwaem dakami.

²⁰Sik-a din mangisalakan ay Diyos mi, sin pese, isalakan mos dakami.

²¹Ngem tegtegem din toktok di kalaban mo ay mangitoltoloy sin basol da ay napalalo.

²²Inkarim ay ialim daida ay mapod Basan ya sin lanad di baybay ay kad-an da,

²³ta igatin mi din dada da ya dildilan di aso mi enggana ay mabsog da.

²⁴Ilaen to di kaipoipogaw din pandad-anam ay mangipaila si nangabakam sin emeyam sin Timplo ay nasantoan.

²⁵Mangon-ona da din komakanta, din babassang ay manamtambol di somigsigonda, maod-odi din mangitgitara.

²⁶Dakayo am-in ay Israelita, idaydayaw yo si Diyos sin gimong yo.

²⁷Din polin Benjamin di mangon-ona, daida di kakitkittoyan ay tribu da, pag din papangolon di polin Juda ya din grupo da. Pag omonod abes di din papangolon di tribun da Zebulun en Naftali.