1Ani lingag Harì Dabid di kafnge i tugad Dwata, Natan, tmalù kenen gablà di kwean ku Batsiba i yaan Yuraya. E Dwata, kandom agu du i kakdom landè kgilin; ge sa i too nun kakdo, taman begam nifu i kdee salàgu di gusmulatam dun.
2Na toom agu nalob mdà di kdee salàgu; nweam kdee sasè di lam nawagu fye too mlaneb.
3Du dilègu dad gukulanggu, na msamuk i nawagu du là agu gamlifet i dad salàgu.
4Di ge alò i gugamsalàgu, du i mgimògu too sasè di kitem; taman too glut i gutadagam dmalam deg, na too matlu i kdee kukumam.
5Too glut agu satu to gamsalà fandà fa di làgu fa sut.