1Napno di nemnem ko si mapteng ay kali ay laydek ay ikanta sin ari. Lapis di nalaing ay mansolat di kaiarigan di dilak, tan mapteng ay kansiyon di ikantak.
2Sik-a, apo ari, di kagowapoan, mo mankali ka, ad-ado di malaylaydan, tan si Diyos et kanayon ay en daka binindisyonan.
3Isiklang mo san kampilan mo, ari ay kapigsaan, madaydayaw ka tan sik-a di kangatoan.
4Mo en ka makigobat, sin panakabalin mo pangabakem di tet-ewa, salaknibam abe din waday kalintegana. Begew sin pigsam, kanayon ay mangab-abak ka!
5Din panam et matadem da, din poson di kaibaw mo et losoken da, ad-ado ay nasyon di somoko en sik-a.
6Din panturayam ay Diyos et magay pap-eng na. Iturayam din ipogaw mo et nalinteg di iyat mon daida.
7Laylaydem din siged ya kalkaliget mo din lawa. Isonga si Apo ay Diyos mo et sik-a di pinili na. Din ragsak ay indawat na en sik-a et ad-ado mo din ragsak di gagait mo.
8San badom et manseng-ew dadlo, tan napay-an si nankinalasi ay bangbanglo. Gan-ganasem din kotingting di arpa sin oneg di palasyo ay nabanol di arkos na.
9Din babbabai sin palasyom et madaydayaw da ay prinsesa. Din wada abe si makannawan mo et din nangato ay reyna. Kabanolan ay balitok di naialti sin awak na.
10Dengngem san ibagak en sik-a ay ikasal di ari. Linglingam et din ogalin di kakailiam ay wadas addawi,
11tan begew sin kinapintas mo maawis en sik-a. Sisya et di apom, isonga tongpalem sisya.
12Din babaknang ed Tiro et isagotan das sik-a, tan kasapolan da di tolong mo en daida.
13Peteg di pintas din reyna ay makiasawa, naidait di balitok sin bado na.
14Maptemapteng din bado na idi maitlod sin kad-an di ari ay on-onoden din abay na ay babbabai.
15Peteg abe ay maragsakan da idi sin palasyo di senggepan da.
16Sik-a abe ay ari, man-ipotot kan to si ad-ado ay lalaki. Tadonen da din aap-om ay aari ed idi, tan din an-ak mo abe yan ari di kaisaadan da, panturayem daida isnan intiro ay daga.