8Sapay koma ta mabigla da ay makna sin bito ay insagana da.
9Et palalon to di ragsak ko mo siya say iyat mo, tan omisalakan ka, Apo.
10Naimposoan ay enak ibaga, “Apo, magay makaison sik-a. Salaknibam din magay bael na sin pamaligatan di napipigsa.”
11Din lawlawa di nemnem da yan omipabasol das baken tet-ewa. Magay ammok sin ipabasol da.
12Kaasiak pay isna, tan sobalitan das lawa din siged ay inamag kon daida.
13Ngem sak-en pay sin nansakitan da yan nanladingitak tet-ewa. Nanbadoak si sako ya initpek di dagaang ko. Nanyakog-ongak ay nankararag,
14kaman din iyat ay mangikararag si gayyem ono kabsat. Kaman din iyat ay mangiladingit si ina din ladingit ko ay paran daida.
15Ngem idi sak-en di nanproblima, linmikob ya sinmisiyek da. Naitapi pay di mangili ay kinmonkontra, magay saldeng di linmaslasoyan da, binmisngibisngit da di kaiarigana.
16Da din ipogaw ay nay ay magay silbi na, mankayetket din bab-a da ay omila gapo si bonget da.
17Apo, pig-an pay di kabayag na ay owat kan il-ilaen nan pomalpaligatan da? Omisalakan ka koma en daida ay layon di kaiarigana.
18Asiak man-iyaman en sik-a, Apo, sin gimong di ad-ado ay ipogaw mo.
19Adim koman ipalobos ay manragsak da gapo sin panladingitak ay iilaen da nan omililiget ay magay gapo na.
20Kasisinit di kali da et man-istorya das baken tet-ewa maipanggep si ipogaw ay managlayad si talna.
21Din kali da yan napalalo. Kanan da, “Hala, inila min inamag mo.”
22Ngem sik-a ay Yahweh et inilam na, isonga adim igiginek, somag-en ka.
23Apok ya Diyos ko, pomika ka ta din kalintegak, ipaneknek mo koma.
24Ikeddeng mo ay magay basol ko, tan nalinteg ka, Yahweh ay Diyos ko. Adim ipalobos ay manragsak dan kalaban ko begew sin ligat ko.
25Adim ipalobos ay kanan da en namingpingsan ay inmabak da et natongpal din layden da.
26Sapay koma ta din amin ay maragsakan ya mangingatos awak da gapo sin enak panligligatan et maabak ya mababainan da ya adi da ammoy amagen da.
27Ngem din manglayad ay mapaneknekan koma ay maga di basol ko tet-ewa, manbogaw da komas layad da ya kanan da ay mangipidwapidwa, “Nangatongato si Diyos ay say panlaydana di mayat ay biyag di baa na.”