Salmo 35:12-28

¹²Kaasiak pay isna, tan sobalitan das lawa din siged ay inamag kon daida.

¹³Ngem sak-en pay sin nansakitan da yan nanladingitak tet-ewa. Nanbadoak si sako ya initpek di dagaang ko. Nanyakog-ongak ay nankararag,

¹⁴kaman din iyat ay mangikararag si gayyem ono kabsat. Kaman din iyat ay mangiladingit si ina din ladingit ko ay paran daida.

¹⁵Ngem idi sak-en di nanproblima, linmikob ya sinmisiyek da. Naitapi pay di mangili ay kinmonkontra, magay saldeng di linmaslasoyan da, binmisngibisngit da di kaiarigana.

¹⁶Da din ipogaw ay nay ay magay silbi na, mankayetket din bab-a da ay omila gapo si bonget da.

¹⁷Apo, pig-an pay di kabayag na ay owat kan il-ilaen nan pomalpaligatan da? Omisalakan ka koma en daida ay layon di kaiarigana.

¹⁸Asiak man-iyaman en sik-a, Apo, sin gimong di ad-ado ay ipogaw mo.

¹⁹Adim koman ipalobos ay manragsak da gapo sin panladingitak ay iilaen da nan omililiget ay magay gapo na.

²⁰Kasisinit di kali da et man-istorya das baken tet-ewa maipanggep si ipogaw ay managlayad si talna.

²¹Din kali da yan napalalo. Kanan da, “Hala, inila min inamag mo.”

²²Ngem sik-a ay Yahweh et inilam na, isonga adim igiginek, somag-en ka.

²³Apok ya Diyos ko, pomika ka ta din kalintegak, ipaneknek mo koma.

²⁴Ikeddeng mo ay magay basol ko, tan nalinteg ka, Yahweh ay Diyos ko. Adim ipalobos ay manragsak dan kalaban ko begew sin ligat ko.

²⁵Adim ipalobos ay kanan da en namingpingsan ay inmabak da et natongpal din layden da.

²⁶Sapay koma ta din amin ay maragsakan ya mangingatos awak da gapo sin enak panligligatan et maabak ya mababainan da ya adi da ammoy amagen da.

²⁷Ngem din manglayad ay mapaneknekan koma ay maga di basol ko tet-ewa, manbogaw da komas layad da ya kanan da ay mangipidwapidwa, “Nangatongato si Diyos ay say panlaydana di mayat ay biyag di baa na.”

²⁸Asiak aben daddad-aten din kinalinteg mo, maninsin-agew ay daydayawek sik-a, Apo.