Salmo 33:1-7

¹Dakayo ay nalinteg, manragsak kayo gapo sin inamag Diyos Apo. Tan din managtongpal sin bilina et lebbeng da ay mangdayaw en sisya.

²Dayawen yo si Diyos babaen si gitara ya arpa.

³Ikantaan yos sisya si baro ay kanta. Esten yo ay mankotingting sin arpa ya ipigsa yo ay mankanta.

⁴Tan din kalin Diyos et pag tet-ewa ya matalek si Diyos sin amin ay amagena.

⁵Din kosto ya nalinteg di laydena. Maila isnan intiro ay daga din komakaman ay layad ya seg-ang na.

⁶Babaen sin kali na et pinarsua na ed daya. Amin ay wadas di et nawada babaen sin bilina.

⁷Din danom sin baybay et sininop na, inpeey na sin lugar ay laydena.