Salmo 139:6-17

⁶Kaeetnga ya naoneg di panakaammom sin kaipogaw ko, adi polos mad-asan di nemnem ko.

⁷Magay mabalin si emeyak ta lomisiak en sik-a, maga polos di enak pantabonan ta adi kan omil-ila.

⁸Mo emeyak ed langit, wada ka, mo bomabaak sin kad-an di natey, iso na ay wada ka.

⁹Olay mo tomayawak ta sin belaan ono diposan di agew di enak pantean,

¹⁰wada ka pay dedan isdi ay omipango sin danan, wada ka ay omitakkay ya bomadang.

¹¹Mabalin ay kanak, “Awni ta malabi ta makdeng nan kaagawan, ta waday mabolinget ay enak pantabonan.”

¹²Ngem olay sin mabolinget, makaila ka pay dedan, tan sin pangilam, mapat-a din labi ay kaman kaagawan.

¹³Sik-a di namarsua sin awak ya nemnem ko, pinkem sak-en sin eges nanang ko.

¹⁴Dayawek sik-a, napateg ay Apo, tan din nangamagam en sak-en et kaeetnga si pannemnem ko. Nakaskasdaaw am-in di inam-amag mo, magay dowadowak, dadlonak ammo.

¹⁵Idi maam-amagak ay adi kaila sin eges inak, inilam di nas-et ay nansisilpoan di tong-ak,

¹⁶tan inmisisin-eng ka idi daanak maianak. Naililista sin librom din kabibilang di agew ko, olay daan pay laeng manlogi din biyag ko.

¹⁷Sik-a ay Diyos, din wadas nemnem mo yan adi kabilang, naligat ay maawatan.