Salmo 119:38-45

³⁸Din karim en sak-en ay baam et tongpalem koma, ay say inkarim sin amin ay mangipateg en sik-a.

³⁹Din nakaskasdaaw ay ikeddeng mo di mangilisi en sak-en sin kaibabainak ay ieg-egyat ko.

⁴⁰Laydelaydek ay tongpalen din bilbilin mo. Nalinteg ka isonga pabaroem kod nan biyag ko.

⁴¹Ipailam kod en sak-en san adi manbalbaliw ay layad mo ya omisalakan ka tan say inkarim, Apo,

⁴²Et mo siya di, din lomaslasoy et mabalin ay songbatak, tan din karim et say pantalkak.

⁴³Idawat mo kod di kabaelak ta kanayon koma ay din tet-ewa di ibagbagak, tan din kosto ay ikeddeng mo di pantalkak.

⁴⁴Kanayon ay tongpalek din linteg mo enggana ay mapospos nan leng-ag ko.

⁴⁵Nawayawayaanak sin ligligat ko, tan ipakat ko din kabaelak ay mangonod sin bilbilin mo.