5Nyangka-tjinguru-yan kulira, “Palya-rna palyamunu palyanma. Nyangkanyka-yayi nyawa Mama Kuurrtukutju walykumunu palyalpayi.” Puru-tjinguru-yan kulira, “Palunyanguru-tjinguru-rni Mama Kuurrtu pungkutjamaaltu wantima palyamunu-rna palyaranyangka.” Tjiinya yarnangulu-tjinguru palunyapirinypa kulilku.
6Wiya, tjinguru-rna palunyapirinypa kulira wantima. Tjinguru-rni pungkutjamaaltu wantiku. Palunyalu pirninyartu pungkutjamaaltu wantima. Wiya, Mama Kuurrtu manta lipingkatjanya ngaratjunkulalpi tjukarurrulu watjalku.
7Tjinguru-yan kulira, “Palya-rna mayuratarrartu watjanma. Tjiinya-yayi pirnilurtu kulila Mama Kuurrtukutju tjukarurrulu watjalpayi. Palunyangka-tjinguru-rni Mama Kuurrtu mirritjunkutjamaaltu wantima tjiinya-rna mayuranyangka.”
8Nyangka kutjupatjarralu-tjinguru-ya watjalku, “Palyamunurringama-la. Pirnilu-yayi Mama Kuurrnga marninypungama palunyanyakutju walykumunu nyinarranyangka.” Tjiinya kutjupatjarralu-ya mayura watjara ngayulu-rnanyu palunyapirinypa watjalpayi. Wiya, Mama Kuurrtu-tjananya palya mirrparnarriku payilku palunyapirinypa-ya watjaranyangka.
9Nyangka-latju Tjiyu pirnilu kuliranytja walykumunu-latju nyinarranytja. Nyangka-yan Tjiyu wiyakutju palyamunu nyinarranytja. Wiya, tjiinya-rna wiyangkalpi watjarnu, pirnilurtu-lan, Tjiyu wiya pirnilu puru Tjiyu pirnilutarrartu purtu kulira palyamunu wantikitjalu.
10Tjiinyamarntu Payipulta kutjulpirtu walkatjunu wantinytjanya ngaapirinypa ngarala, “Kutjupanya tjukarurru nyinanytjamunu.
11Pirnilurtu-ya purtu kulira tjukarurru nyinakitjalu. Puru kutjupanya mukurringkulanytjamunu Mama Kuurrku nintirrikitja.
12Tjiinyamarntu-ya pirnilurtu Mama Kuurrnga wantirralpi pinkurraarnu. Palunyalu-ya yungarralu kulira kutjupa-kutjupa palyamunu palyara. Mularrpa kutjupanya tjukarurru nyinanytjamunu tjiinya walykumunu palyalkitja.
13Tjiinyamarntu-tjananyaya wangka kurranytjiltu mirrikutulpayi. Puru-ya yarlamayura muku-mukura mirri pungkupayi. Puru-ya palyamunu watjara pika lipirntankupayi. Tjiinyakurlu lirrulu pitja patjala mirrirntarra, palunyapirinytju.
14Kartirti yirilu-ya yayirnirringkula tirtu warrkipayi.
Ruumalakutu 3
Ruumalakutu 3:5-14