ROMANOS 3:5-14

⁵Quinga chəsə'əna baḻə beṉə' cui chse'eɉni'i c̱he Diozən'. Chəsə'əne' de que de'e mal de'en choncho chlo'in beṉac̱hən' de que Diozən' naque' beṉə' chon de'e güen. Na' chəsə'əne' de que Diozən' bito zde' ḻicha de'en goṉe' castigw c̱he de'e mal de'en chonchon'.

⁶Ḻechguaḻe clelən' chso'one' xbabən'. Žaḻə' de'e ḻi can' chsa'aquene'enə' bitoczə gaquə gon Diozən' yeḻə' jostis c̱he chio'o beṉac̱h can' cheyaḻə'ənə'. Pero la' goncze'en.

⁷Na' beṉə' ca' chso'on xbabən' ca' ḻeczə chəsə'əne' de que catə' chso'onḻaže'e chso'one' ca chesyə'əyacbe'i beṉə' de que Diozən' naque' beṉə' güen ca naquən' cho'e por dižə' ḻi. De'e na'anə' chsa'aquene' de que bito cheyaḻə' c̱hoglao Diozən' c̱hega'aque' de que zɉənape' doḻə' ca de'en chso'onḻaže'e.

⁸Baḻə beṉə' chso'one' contr neto', na' chso'one' cho'ato'onə' chəsə'əne' de que nato' ¿bixc̱hen' cui goncho de'e malən' par nic̱h gaquə de'e güenṉə'? Ca cheyaḻə'əczən' əgwnežɉo Diozən' castigw c̱he non' ṉa ca'.

⁹¿Bixan' ža? ¿Enaquəch chio'o beṉə' Izrael beṉə' güench cle ca chio'o cui naccho beṉə' Izrael? Bito. Can' bagwnia', tozəczə can' chac c̱he chio'o beṉə' Izrael na' c̱he chio'o cui naccho beṉə' Izrael, yoguə'əcho zocho xni'a de'e malən'.

¹⁰Can' nyoɉczə Xtižə' Diozən' nan: Notono zo beṉə' zda ḻicha, ni tlišə'əze'.

¹¹Notono nḻa' beṉə' cheɉni'i c̱he Diozən', na' notono nḻa' beṉə' cheyilɉe'ene'.

¹²Yoguə' beṉac̱hən' bagosə'əque'e nez mal. Yogue'e bitobi zɉəzaque'e. Ni tlišə'əzə beṉə' chon de'e güen notono nḻa'.

¹³Len xtižə'əga'aque'enə' chəsə'əx̱oayaguene'en beṉə', na' ca benen c̱he bgüizə' gwxaquə'əlebe dižə' de'en chso'enə'. Ca zbanṉə' chḻa' cuerp c̱he bia guatən' catə'ən bachožə'ən, ca' zbanṉə' naquə xtižə'əga'aque'enə'.

¹⁴Por dižə' mal dižə' əzban ža' cho'aga'aque'enə'.