ROMANOS 3:5-14

⁵Waquin Israel runa jucha aparicushanta tucuy-jinanpa chapacur nin: «Tayta Diosninchi allita rurananpaj imatapis ruräman. Juchata aparicuptïsi, aunishan-jina shiminta ćharcun. Shiminta ćharcunan alli. Chaymi shiminta ćharcüshiycaptï, wascamänan mana camacanmanchu, ¿au?»

⁶Ichanga runa chapacuyta mana camäpacungachu. Tayta Diosninchi llapan runata iwal rican. Israel runacunapa juchantapis, jäpa runacunapa juchantapis llapanta jurgapanga.

⁷Chaypis waquin runa chapacur ninmanćhi: «Shiminta mana ćharcuptïsi, Tayta Diosninchi juchäta mana jurgapämanmanchu. Jurgapämaptinmi ichanga, waquin runacunapis Tayta Diosninchita manchapacunga: ‹Ima allish Tayta Diosninchi shiminta sumaj ćharcun› nir. Chaynuy Tayta Diosninchita manchapacuptin, allipäćhi jucha aparicushäpis, ¿au?»

⁸Chaynuypis chapacun: «Rasunpa llutanta ruraptï, Tayta Diosninchi llaquipämashpan alliman ćhayachimanga. Pablush chaynuy willapäcuycan» nir. Chaynuy tumpacujcunata quiquin Tayta Diosninchi llapan juchanta jurgapanga.

⁹Chaymi ama nishuwanchu: «Israel runacunalla Tayta Diosninchipa shungunman tincun.» Llapallanchi juchallicushcanchi. Israel runacunapis, jäpa runacunapis shungunchi munapashanta rurar, juchaćhu cawaycanchi.

¹⁰Tayta Diosninchipa shimin isquirbirashanćhu nin: «Tayta Diosninchipa ricay ñawinćhu llapan runa juchayuj.

¹¹Llapan pishi-yarpayyuj. Tayta Diosninchipäga mana imasi jucunchu.

¹²Llapan runa Tayta Diosninchita wasguipasha. Pantacash purin. Mayganpis allita mana ruranchu.

¹³Runa-masinta asyächicun. Llullacullar cawan. Wañuchicuj curu-yupay cawar, pitapis ashllir ushyan.

¹⁴Chiquicur, runa-masinta pampaman ćhuran. Jagayächicuyllaćhu arun.