Romu 4:6-24

⁶Deviti'a anahukna huno ama anazanku nanekema hu'neana, Anumzamo'ma kumi vahekuma fatgo vahere huno hu'nea asomu kema hu'nea nanekefina huno,

⁷Anumzamo'ma magomofo hazenke zama'ane, kumi'ama atrentenesimo'a muse hiho.

⁸Kumi hu'nesia zankuma ramoma kumi hu'ne huno osaniazankura muse hino. (Sam-Zga 32:1-2)

⁹Ama ana asomura Jiu vahe'mofo zanke me'nefi, oku zamavufga taga osu megi'a vahe'mokizmi zanene? Tagra Abrahamunkura, Anumzamo'a fatgo nere huno hu'ne huta nehune. Na'ankure agra amentinti hu'negeno'e.

¹⁰Hu'neanagi inankna higeno anazana efore hu'ne? Agra oku avufga tga hutegeno fatgo nere huno hu'nefi, oku avufga tga osu'negeno'e? Ana hu'neankita hufra okigosune. Abrahamu'a oku avufga tga osu'negeno Anumzamo'a avarene.

¹¹Oku avufgama tga hu'zana amentinti huzamofo avame zankino, ko Abrahamu'a amentinti higeno Anumzamo'a avregeno, fatgo nere huno huntene. Oku avufgama tga osunere anagea huntene. E'ina hu'negu oku zamavufga tga osu vahe'mo'za zamentintima haza vahe'mokiziminena, Anumzamo'a fatgo hu'naze huno huzmantesigeno, Abrahamu'a avamupina nezmafaza hugahie.

¹²Anazanke huno oku zamufga tga hu'nazamo'za Abrahamuma oku avufga tga osu'neno amentinti higeno, fatgo nere hu'neakna hu'za zamentinti hanaza vahe'mokizmia, Abrahamu'a avamupina nezmafa mani'ne.

¹³Na'ankure Anumzamo'ma Abrahamune agehe'mokizmi huvempa ke huzmanteno, ana miko mopa zami'neana Anumzamofo kasege amage antezantera ozami'ne. Hianagi Anumzamo'enema amentintifima fatgo huno mania zante ami'ne.

¹⁴Hagi Anumzamo huvempa huzmante'nemo'za kasege avriri zampinti huvempa huzmante'neazama erizasina zmentinti hu'zamo'a nena rga'a oregeno, huvempa hu'nea kemo'enena amne'za sesine.

¹⁵Hu'negu kasege'mo'a arimpahe'za avreno ne-e. Hianagi kasegema omneresina kasegema rutagre'zana omanesine.

¹⁶E'ina hu'negu Anumzamo huvempa huzmante'neazana zmentinti haza vahe'mo'za enerize. E'i ana musezana Mosese kasege amage nentesio, nontesio Abrahamuma hu'neankna amentintima hanimo erigahie. Hu'negu Abrahamu'a ana miko zamentini vahe'mokizimi nezamafa'e.

¹⁷E'i ana zanku avontafepina Anumzamo'a asamino, kagra rama'a vahe'mokizmi nezmafaza hugahane hu'ne. E'i anazama fore hu'neana na'ankure Anumzamo'a fri'naza vahera zamasimu nezamino, hakarea'zana Agra erifore hu'ne huno Abrahamu'a amentinti hu'nea zantere. (Jen-Agf 17:5)

¹⁸Amentintima huzamofona amuha hu'zana omaneanagi, Abrahamu'a ana miko vahe'mokizmi nezmafana manigahue amentinti azeri hankavetinegeno, Anumzamo'a negeno fatgo nere huntene. Kagehe'moza hakare hanageno hamprigara osugosie hu'ne. (Jen-Agf 15:5)

¹⁹Abrahamu'a 100 ti'a kafuzge maniteno keana avufgamo'a mofavre eri fore huga osigeno, Sara enena tvavateno mofavre ksentega osu'neanagi, Abrahamu'a amentinti hu'neazana otre'ne.

²⁰Anumzamo'ma huvempa hunte'nea zankura Abrahamu'a tare rimpa osu'neanki, amentintimo'a mago'ane hankavenetigeno anazamo'a Anumzamofona ragia ami'ne.

²¹Anumzamo'a huvempama hunante'neazana amane hunantegahie huno rimpa fru Abrahamu'a erine.

²²E'ina hu'negu Abrahamuma amentinti hu'nea zanku, Anumzamo'a fatgo nere huno huntene.

²³Anumzamo Abrahamunku fatgo nere huno hunte'neana, agrake azahu'za erisia zanku huno kreonte'neanki,

²⁴tagriku enenku huno krente'naze. Jisasi'ma fri'nefinti azeri oti'nea Rantimofonte tamentinti hunentonkeno, Anumzamo'a tazeri agru hunerantene.