Roma 4:6-24

⁶Doha hinage Davida ena uriuri eai tau ena nuawoiwoina i ribaei, ia wa Eaubada i awa‐laulaududuraiei, nige ena paipaisoa debadi eai; i ene:

⁷“Isi edi laulau baaea se ribagigiridio, edi laulau baaea se poitawaidio, nuadi se woiwoina;

⁸tau Eaubada nige i riba‐taubaaeaei, nuana i woiwoina.” (Psa. 32.1-2.)

⁹Wau nuawoiwoina wa, isi tau‐peritome isibom abo se abi, e tatao nige se heperitomedi abo se abi hinage? Paana ita ta ’ne, Aberahama ena sunuma debana eai ia se awataulaulaududuraiei.

¹⁰Edoha edi awaawa‐taulaulaududuraiena? Ia se heperitomeyao, e sora nige se heperitome? Ia sora nige se heperitome.

¹¹Ia se heperitome doha heiheinoi mo, ena sunuma laulaududuraina heiheinoina huia ne sora nige se heperitome wa; ia abo tauataiena gamagamagari tamadi eai ie lau, isi wa nige se heperitomedi, edi sunuma debana eai mo se awaawa‐taulaulaududuraiedi.

¹²Eo ia abo tauperiperitome tamadi eai ie lau, na isi mo nige’e, isi hinage gamagamagaridi tamadi Aberahama ena sunuma laulauna se laulauwatai, sunuma wa i abiyao ia sora nige se heperitome.

¹³Paana ribahesunuma wa, Aberahama eo ia pesipesinayao aridi eai se ribaei si ene ia tanoubu abo i tanuagaei, nige laugagaeona debana eai i laoma, na sunuma laulau‐duduraina mo.

¹⁴Na, ena tau‐laulaududurai laugagaeona eai, isi tanoubu abo se tanuagaei, sunuma abo nige aniona, eo ribahesunuma wa hinage nige ana ao.

¹⁵Paana ede laugagaeona wa ouyalayala aba‐hetubuna ede: na haedi eai laugagaeona nige’e, laugagaeo utusina nige’e.

¹⁶Arinai sunuma eai mo ribahesunuma wa i tubuma, ainauia debana eai, bena ia pesipesinayao gamagamagari aridi eai ribahesunuma wa tatao se hemamohoiei; isibom laugagaeo ribana eai enadi mo nige’e, isi hinage enadi Aberahama ena sunuma tau‐abina, ia gamagarida tamada ede,

¹⁷doha se uriyao si ene, “Ea hetorom oa eanua gamagaridi urutubudi eai u lau;” (Gen. 17.5.) Eaubada i sunumawatai wa matana eai, ia taumatemate tauhemauridi, eo ginauri sora nige se hetubudi ena riba eai abo se tubu.

¹⁸Ia ena sunuma doha nige aniona, taiede i sunumawatai mo, eanua gamagamagari bena abo i hemala tamadi; doha se ribaei wa si ene, “Doha hinage meta pesipesimyao abo se gamagari.” (Gen. 15.5.)

¹⁹Tauna i nuatui se beruberuo, ena gigibori se lautom’o, na ena borimai handere i hanahanau, eo Sara i nuatui i agari hinage, taiede ena sunuma nige i beruberu.

²⁰Eaubada ena ribahesunuma nige i awayagaraei, eo nige i tagugu, ena sunuma mo i adidiri, eo Eaubada i ribatausaei;

²¹ena nuatu adidirina eai i ene, saha eo saha i ribahesunumaei abo hinage abina i ata i hemamohoiei.

²²Arinai ede ena sunuma ia arinai se awa‐laulaududuraiei. (Gen. 15.6.)

²³Se uri wa si ene, “Ia arinai se awa‐laulaududuraiei;” iabom mo nige se nuatui,

²⁴se nuatuida hinage. Ita arida eai nige baeaona sunumada abo se awa‐laulaududuraiei, ita Iesu eda Guiau mate eai i hetorouioi, tausunusunumaena.